काठमाडौं । हाइड्रोपावरको सेयरमा चमक आउँदा सेयर बजारले फेरि नयाँ रेकर्ड बनाएको छ । पछिल्लो समय प्रायः दैनिक नयाँ रेकर्ड बनाउँदै आएको नेप्सेले आज फेरि नयाँ कीर्तिमान बनाएको हो ।
बिहीबार इतिहासकै सर्वाधिक उच्च विन्दुमा पुगेको सेयर बजारले आज त्यो रेकर्ड तोड्दै सर्वाधिक विन्दुको कीर्तिमान बनाएको हो ।नेप्सेले २६४० विन्दु पार गर्दै इतिहासकै उच्च विन्दुमा पुगेको हो । नेप्सेले २६४० विन्दु पार गरेको इतिहासमै पहिलो पटक हो । यसअघि बिहीबार नेप्सेले इतिहासकै उच्च २६३६.६८ विन्दु पार गरेको थियो ।
आज सेयर बजार मापक सूचक नेप्से ३.६६ अंकले बढेर २६४०.३४ विन्दुमा पुगेको छ । नेपाल स्टक एक्सचेन्जका अनुसार आज २०७ कम्पनीको ८ अर्ब ८३ करोड ४६लाख ३९ हजार ९६७ रुपैयाँ बराबरको २ करोड ४३ लाख ५ हजार ६६ कित्ता सेयर किनबेच भएका छन् ।
सोमबार कारोबारमा आएका १२ वटा समूहमध्ये ७ वटा समूहको परिसूचकमा हरियाली छाएको छ भने ५ वटा समूहको परिसूचक राताम्मे भएका छन् । हाइड्रोपावर समूहको परिसूचक सबैभन्दा धेरै ८३.२७ अंकले बढेको छ भने जीवन बीमा समूह सबैभन्दा धेरै ३६१.४६ अंकले घटेको छ ।
कारोबारमा आएका २०७ कम्पनीमध्ये ९१ कम्पनीको सेयर मूल्य बढेको छ भने १०७ कम्पनीको मूल्यमा गिरावट आएको छ । ९ कम्पनीको मूल्य स्थिर रहेको छ ।
आज लगानीकर्ता नेपाल बैंकको सेयरमा झुम्मिएका छन् । यसको सबैभन्दा धेरै ६१ करोड ७४ लाख रुपैयाँ बढीको कारोबार भएको छ । कारोबार रकमकै आधारमा नेपाल इन्फ्रास्ट्रक्चर बैंक ५५ करोड र ग्लोबल आइएमई बैंक ३२ करोडको कारोबार सहित शीर्ष तीनमा रहे ।
आज हाइड्रोपावर समूहको सेयरमा उछाल आएको छ । कारोबारमा आएका अधिकांश हाइड्रो कम्पनीको मूल्य बढेको छ । झिनो अंकले बढेको बजारमा आज ७ कम्पनीको सेयर मूल्यमा पोजेटिभ सर्किट लागेको छ । माथिल्लो तामाकोशी, शिव श्री, नेशनल हाइड्रो, नेपाल इन्फ्रास्ट्रक्चर बैंक, चन्द्रागिरी हिल्स, समृद्धि फाइनान्स र एनआइसी एशिया फण्डका सेयरधनीले १० प्रतिशत कमाएका छन् ।
बढ्दो बजारमा आज बेस्ट फाइनान्सका सेयरधनीले सबैभन्दा धेरै ३.३७ प्रतिशत गुमाएका छन् ।
