काठमाडौं । बैंकिङ क्षेत्रमा चमक कायमै रहँदा सेयर बजारले फेरि नयाँ रेकर्ड बनाएको छ । यससाता सोमबारदेखि दैनिक नयाँ रेकर्ड बनाउँदै आएको नेप्सेले आज फेरि नयाँ कीर्तिमान बनाएको हो ।
बुधबार इतिहासकै सर्वाधिक उच्च विन्दुमा पुगेको सेयर बजारले आज त्यो रेकर्ड तोड्दै सर्वाधिक विन्दुको कीर्तिमान बनाएको हो ।नेप्सेले २६३६ विन्दु पार गर्दै इतिहासकै उच्च विन्दुमा पुगेको हो । नेप्सेले २६३० विन्दु पार गरेको इतिहासमै पहिलो पटक हो । यसअघि बुधबार नेप्सेले इतिहासकै उच्च २६११.४५ विन्दु पार गरेको थियो ।
नेपाल राष्ट्र बैंकले मौद्रिक नीतिको अर्धवार्षिक समीक्षा गर्दै सेयर बजार सम्बन्धी विद्यमान कुनै पनि व्यवस्था परिवर्तन नगरेसँगै लगानीकर्ता उत्साहित हुँदा यससाता लगातार बजार उकालो लागेको हो । सोमबार एकैदिन ९२ अंकको उछाल आएको बजारमा त्यसयता हरेक दिन दोहोरो अंकले बढ्दै आएको छ ।
यस्तै, नेप्से इतिहासकै उच्च विन्दुमा पुगेको दिन लगानीकर्ताको सम्पत्ति ३५ अर्बले बढेर बजार पूँजीकरण सवा ३६ खर्ब नाघेको छ । यो हालसम्मकै धेरै हो । नेप्सेका अनुसार बिहीबार सूचीकृत कम्पनीहरुको कुल बजार पूँजीकरण ३६ खर्ब ३३ अर्ब पुगेको छ ।
आज सेयर बजार मापक सूचक नेप्से २५.२३ अंकले बढेर २६३६.६८ विन्दुमा पुगेको छ । नेपाल स्टक एक्सचेन्जका अनुसार आज २०६ कम्पनीको ८ अर्ब ७६ करोड २१ लाख ४६ हजार ७८५ रुपैयाँ बराबरको १ करोड ९६ लाख ४६ हजार ५७८ कित्ता सेयर किनबेच भएका छन् ।
सोमबार कारोबारमा आएका १२ वटा समूहमध्ये ९ वटा समूहको परिसूचकमा हरियाली छाएको छ भने ३ वटा समूहको परिसूचक राताम्मे भएका छन् । व्यापार समूह सबैभन्दा धेरै ७२.९२ अंकले बढेको छ भने जीवन बीमा समूह सबैभन्दा धेरै १०९.७३ अंकले घटेको छ ।
कारोबारमा आएका २०६ कम्पनीमध्ये १०४ कम्पनीको सेयर मूल्य बढेको छ भने ८४ कम्पनीको मूल्यमा गिरावट आएको छ । १८ कम्पनीको मूल्य स्थिर रहेको छ ।
आज लगानीकर्ता एनआइर्सी शिया बैंकको सेयरमा झुम्मिएका छन् । यसको सबैभन्दा धेरै ५६ करोड १ लाख रुपैयाँ बढीको कारोबार भएको छ । कारोबार रकमकै आधारमा नेपाल इन्फ्रास्ट्रक्चर बैंक ५० करोड र सिभिल बैंक ३७ करोडको कारोबार सहित शीर्ष तीनमा रहे ।
दोहोरो अंकले बढेको बजारमा बिहीबार ८ कम्पनीको सेयर मूल्यमा पोजेटिभ सर्किट लागेको छ । नेपाल हाइड्रो डेभलपर, कर्णाली डेभलप्मेन्ट बैंक, एभरेष्ट बैंकको प्रिफिरेन्स सेयर, सिभिल बैंक, नेपाल इन्फ्रास्ट्रक्चर बैंक, कर्पोरेट डेभलपमेन्ट बैंक, समृद्धि फाइनान्स र ग्रीन डेभलप्मेन्ट बैंकका सेयरधनीले करिब १० प्रतिशत कमाएका छन् ।
बढ्दो बजारमा आज मिर्मिरे माइक्रोफाइनान्सका सेयरधनीले सबैभन्दा धेरै ४.९१ प्रतिशत गुमाएका छन् ।
