काठमाडौं । चन्द्रागिरी हिल्सको दोस्रो बजारमा सेयर कारोबार शुरु भएसँगै सेयर किन्नेको ओइरो लागेको छ ।
शुक्रबार नेप्सेमा सूचीकृत भएसँगै कम्पनीको सेयर आजदेखि कारोबारमा आएको हो । १६१ रुपैयाँ कारोबार खुलेको कम्पनीको १२ बजेसम्म सोही मूल्यमा जम्मा २० कित्ता सेयर कारोबार भएको छ ।
मूल्य खासै नबढे पनि कम्पनीको सेयर किन्न चाहनेको भीड लागेको छ । १२ बजेसम्म कम्पनीको करिब १४ लाख कित्ता भन्दा बढी सेयर खरिदका लागि माग भएको छ भने विक्रीमा १ कित्ता पनि सेयर छैन ।
कारोबार खुलेका शुरुवाती दिनमै सेयर हात पार्न सके केही हप्तामा मनग्ये नाफा कमाउन सकिने भएकाले लगानीकर्ता यसरी झुम्मिएका हुन् । यद्यपि, विक्री कर्ता नभएकाले अर्डर राखे पनि सेयर पाउने सम्भावना भने अत्यन्तै कम छ ।
कम्पनीले पुस २४ गतेदेखि प्रतिकित्ता १०० रुपैयाँ दरले १५ करोड ३४ लाख ९१ हजार रुपैयाँ बराबरको १५ लाख ३४ हजार ९१ कित्ता आइपीओ निष्काशन गरेको थियो ।
कम्पनीको आइपीओमा कुल १२ लाख ११ हजार ११५ जनाले आवेदन दिएका थिए । सोमध्ये भाग्यमानी १ लाख ३९ हजार ६०२ जनाले गोलप्रथाबाट १० कित्ताका दरले सेयर पाएका थिए भने १० लाख ७१ हजार ५१३ आवेदकको हात रित्तो भएको छ ।
