काठमाडौं। नेपाल राष्ट्र बैंकको रियल टाइम भुक्तानी प्रणाली (आरटीजीएस) प्रणालीमा थप १० वटा वित्तीय संस्था आबद्ध भएका छन् ।
नेपाल राष्ट्र बैंकले एक सूचना जारी गर्दै उक्त प्रणालीमा ८ विकास बैंक र दुई फाइनान्स कम्पनी थपिएको जानकारी गराएको छ ।
राष्ट्र बैंकका अनुसार ‘ख’ वर्गका ज्योति विकास बैंक, महालक्ष्मी विकास बैंक, मुक्तिनाथ विकास बैंक, कामना सेवा बैंक र गरिमा विकास बैंक रहेका छन्। यसैगरी सांग्रिला डेभलपमेन्ट बैंक, साइन रेसुंगा डेभलपमेन्ट बैंक, लुम्बिनी विकास बैंक आरटीजीएस प्रणालीमा आबद्ध भएका छन्।
यसैगरी, ‘ग’ वर्गका आइसीएफसी फाइनान्स र मञ्जुश्री फाइनान्स पनि यस प्रणालीमा आबद्ध भएको राष्ट्र बैंकले जनाएको छ।
यससँगै आरटीजीएस प्रणालीमा आबद्ध हुने बैंक तथा वित्तीय संस्थाको संख्या ३७ पुगेको छ । यसअघि ‘क’ वर्गका २७ वटा वाणिज्य बैंक यस प्रणालीमा आबद्ध थिए।
राष्ट्र बैंकले २०७६ भदौ २६ गतेदेखि औपचारिक रुपमा यो प्रणाली कार्यान्वयनमा ल्याएको थियो ।
यो प्रणाली मार्फत चेक नकाटी सीधै एक बैंकको खाताबाट अर्को बैंकको खातामा भुक्तानी गर्न सकिन्छ । कारोबार भएको वास्तविक समयमै बैंकहरुबाट तुरुन्तै भुक्तानी पाइनेछ। यस प्रणालीबाट भुक्तानी गर्दा चेक क्लियरिङ गरिरहनु पर्दैन।
