काठमाडौं । राष्ट्रिय गौरवको आयोजना अन्तर्गत निर्माणाधीन गौतमबुद्ध अन्तर्राष्ट्रिय विमानस्थलको भौतिक पूर्वाधार निर्माण लगभग सकिए पनि उपकरण जडानमा ढिलाइ हुँदा तोकिएकै समयमा संचालन हुनेमा अन्योलता देखिएको छ ।
हालसम्म पूर्वाधार निर्माणको काम ९३ प्रतिशत सम्पन्न भइसके पनि विकानस्थल सञ्चालनका लागि आवश्यक पर्ने मुख्य उपकरण जडान हुन नसक्दा अन्योलता देखिएको हो ।
विमानस्थलको अधिकांश भौतिक संरचना निर्माण पूरा भए पनि उपकरण जडान र फिनसिङको काम अझै बाँकी छ । विदेशी प्राविधिक नआउँदा उपकरण जडान प्रभावित भएको छ । जसकारण आगामी जनवरदेखि सञ्चालनमा आउने भनिएको विमानस्थल तोकिएकै समयमा सञ्चालन हुनेमा अन्योलता देखिएको छ ।
विमानस्थल निर्माणका उपकरणहरू जडानको जिम्मेवारी पाएको थाइल्याण्डको एरोथाई कम्पनीले प्राविधिक जनशक्ति नपठाउँदा उपकरण जडानमा ढिलाइ भएको हो । कोभिड १९ को कारण थाइल्याण्ड सरकारबाट लगाइएको यात्रा प्रतिबन्धको कारण देखाई कम्पनीले आफ्ना प्राविधिक जनशक्ति नपठाउँदा साइटमा आइसकेको उपकरण जडान कार्य हुन सकेको छैन ।
विमानस्थलका निर्माण कार्य सम्पन्न भई हस्तान्तरण हुनसाथ विमानस्थल संचालनका लागि गर्नुपर्ने विमानस्थल प्रमाणीकरण, यन्त्र उपकरणको क्यलिब्रेसन गरी यथाशीघ्र संचालनमा ल्याउने तयारी भइरहेको नेपाल नागरिक उड्डयन प्राधिकरणका महानिर्देशक राजन पोखरेलले बताए ।
उनले जनशक्ति पूरा भए सम्पन्न हुन १ महिना मात्र लाग्ने बताए । उडानका प्रकृयाहरू धेरै भएकाले निर्माण सम्पन्न भएको ३ महिनामा उडान शुरू गर्न सकिने उनले बताए । ‘उपकरण पठाउने कम्पनीले जडानका लागि जनशक्ति पठाएको छैन, उनीहरू नआएसम्म हामीले जडान गर्न सकिँदैन, सामान सबै आइसक्यो, उनीहरू आएको १ महिनामा निर्माण सम्पन्न हुन्छ,’ पोखरेलले चाणक्य पोष्टसँग भने ।
गत आर्थिक वर्ष २०७६/७७ मा विमानस्थलको भौतिक प्रगति ९१ प्रतिशत रहेको थियो । चालू आर्थिक वर्षको ६ महिनामा विमानस्थल निर्माण ९३ प्रतिशत मात्र पूरा भएको हो । यसरी हेर्दा चालू आवमा थप २ प्रतिशत मात्र भौतिक प्रगति भएको देखिन्छ ।
२०१७ को जनवरीसम्ममा २५ प्रतिशत मात्र कार्य सम्पन्न भएको यस आयोजनाले पछिल्लो समय ९३ प्रतिशत कार्य सम्पन्न गरेको हो ।
विमानस्थल निर्माणमा गतिरोध उत्पन्न भए पछि विगतमा एशियाली विकास बैंकले लगानीबाट हात झिकेको थियो । त्यसपछि पुन गति लिन थालेको विमानस्थल निर्माणमा एशियाली विकास बैंकले फेरी आयोजनामा सहभागीता देखाएको छ ।
प्राधिकरणका अनुसार चिनीया कम्पनी नर्थवेस्ट सिभिल एसिएशन एयरपोर्ट कन्स्ट्रक्सन ग्रुपले विमानस्थलको भौतिक संचना निर्माणको काम सकेको छ । टर्मिनल, प्रशासनिक भवन, अग्नी निवारण तथा कन्ट्रोल टावरको काम सकिएको हो ।
हाल धावनमार्ग, टर्मिनल भवनसहितका संरचना बनेर यन्त्र तथा उपकरण जडानको काम भइरहेको छ । विमानस्थलमा उपकरण ल्याउने र जडान गर्ने जिम्मा एरोनटीकल रेडियो अफ थाइल्याण्डले पाएको छ । जडानका लागि थाइ र चिनियाँ दक्ष कामदार आवश्यक पर्छ ।
चिनियाँ जनशक्तिहरू च्याक्सीन लगाएर आउने प्रकृयामा रहेका छन् । थाइल्याण्डका जनशक्ति भने आउनै बाँकी रहेको छ । ३ हजार मिटर लामो धावनमार्ग, ट्याक्सी वे र एप्रोनको सिभिलतर्फको काम सकिएर विद्युतीको काम भइरहेको छ ।
