विश्वकै ठूलो क्रिप्टोकरेन्सी बिटक्वाइनको मूल्य ३४ हजार डलर पुगेको छ । केही हप्ता अघि मात्र यो क्रिप्टोकरेन्सीको मूल्यले ऐतिहासिक विन्दु चुमेको थियो ।
गत डिसेम्बर महिनामा यसको मूल्य करिब ५० प्रतिशतले बढेर पहिलोपटक २० हजार डलर पुगेको थियो । त्यसको केही हप्तामै फेरि बढेर यसको मूल्यले ३४ हजार डलर चुमेको हो ।आज आइतबार ७.८ प्रतिशतले बढेर सिङ्गापुरमा यसको मूल्य ३४ हजार डलर पुगेको हो ।
गत मार्च महिनामा कोरोना भाइरसका कारण २५ प्रतिशत सम्म घटेको यो बिवादास्पद क्रिप्टोकरेन्सीले फेरि महामारीकै बीच उच्च विन्दु चुमेको छ ।
सन् २०२१ को पहिलो त्रैमाससम्ममा बिटकोइनको मूल्य ५० हजार डलरसम्म पुग्ने अनुमान विज्ञहरुले गरेका छन् । ठूला संस्थागत लगानीकर्ताहरुले यो हप्तादेखि फेरि यो क्रिप्टोकरेन्सी तर्फ आँखा लगाउन थालेका कारण आगामी दिनमा मूल्य थप बढ्दै जाने अनुमान विज्ञहरुले गरेका हुन् । अहिलेको विदाको समय पछि ठूला लगानीकर्ताहरु यसतर्फ आकर्षित हुने उनीहरुको विश्वास छ ।
विश्वका ठूलो लगानी पोर्टफोलियोमा बिटक्वाइनको संख्या बढ्दै जान थालेको ब्लुमबर्गले पनि जनाएको छ । बिटक्वाइनको पक्षमा बोल्नेहरुले यो क्रिप्टोकरेन्सी सम्पत्ति स्टोर गर्ने राम्रो माध्यम भएको बताउँदै आएका छन् । मुद्रास्फितिले नछुने कारण केन्द्रीय बैंकले छाप्ने पैसा भन्दा पनि यो भरपर्दो रहेको उनीहरुको दाबी छ ।
ब्लुमबर्ग टेलिभिजनलाई अन्तवार्ता दिँदै स्कट माइनर्ड नाम गरेका एक लगानी कम्पनीका अधिकारीले यसको मूल्य कालान्तरमा ४ लाख डलर पुग्ने बताएका छन् ।
तर, कम कारोबार हुने हुनाले यसमा जोखिम पनि उत्तिकै रहेको जानकारहरु बताउँछन् । गत नोभेम्बर महिनामा मात्रै यसको मूल्य १४ प्रतिशतले घटेको थियो ।
