काठमाडौं । सेयर बजारमा दोहोरो अंकको गिरावट आएको छ । पछिल्ला तीन दिनमै करिब १३५ अंकले बढेको बजारमा आज करिब ३० अंकको गिरावट आएको हो ।
सूचकसँगै कारोबार रकममा पनि ह्वात्तै गिरावट आएको छ । बुधबारको तुलनामा आज कारोबार रकम करिब डेढ अर्बले घटेको छ ।
सेयर बजार मापक सूचक नेप्से २९.८३ अंकले घटेर २०३८.६३ बिन्दुमा आइपुगेको छ । साताको अन्तिम कारोबार दिन बिहीकार २०४ कम्पनीको ५ अर्ब ३६ करोड ९० लाख ४६ हजार ३२२ रुपैयाँ बराबरको ९८ लाख ६० हजार ५३६ कित्ता सेयर किनबेच भएका छन् ।
आज कारोबारमा आएका १२ वटा समूहमध्ये होटल र व्यापार बाहेक अन्य सबै समूहको परिसूचक राताम्मे भएका छन् । होटल समूहको परिसूचक सबैभन्दा धेरै ९३.४ अंकले बढेको छ भने जीवन बीमा समूहको सबैभन्दा धेरै ४३१.८७ अंकले घटेको छ ।
कारोबारमा आएका २०४ कम्पनीमध्ये जम्मा ३६ कम्पनीको सेयर मूल्य बढेको छ भने १५३ कम्पनीको मूल्यमा गिरावट आएको छ । १५ कम्पनीको मूल्य स्थिर रहेको छ ।
आज लगानीकर्ताको रोजाइमा नबिल बैंक परेको छ । गत आवको नाफाबाट ३५ प्रतिशत लाभांश घोषणा गरेको बैंकको सेयरप्रति लगानीकर्ता आकर्षित भएका हुन् । आज यसको सबैभन्दा धेरै ६१ करोड ४९ लाख रुपैयाँ बढीको कारोबार भएको छ ।
कारोबार रकमकै आधारमा नेपाल लाइफ इन्स्योरेन्स ५९ करोड र एनआइसी एशिया बैंक ३२ करोड सहित क्रमशः दोस्रो र तेस्रोमा रहे ।
दोहोरो अंकको गिरावट आएको बजारमा आज सोल्टी होटलको सेयर मूल्य सबैभन्दा धेरै ५.६७ प्रतिशतले बढेको छ भने समृद्धि फाइनान्सको सबैभन्दा धेरै ८.११ प्रतिशतले घटेको छ ।
