टोलै थर्काउने गरी बाइक चलाउने विरुद्ध कडा एक्शन, बाटोमा देखे १०३ मा खबर गर्न आग्रह
चाणक्य पोष्ट
प्रकाशित : 3:44 pm, बिहीबार, पुस ९, २०७७

काठमाडौं । माइतिघर सडक छेउमा एक महिला दूधे बालक बोकेर उभिइरहेकी थिइन् । बालक रमाइरहेको थियो । यसैबीच सडकमा एकजना झल्लाले बेस्सरी आवाज आउने मोटरसाइकल हुँइक्यायो । बच्चोको सातो गयो, कोहोलो हालेर रुन थाल्यो । आमाले झल्लालाई धारेहात लाउँदै ‘असत्ती’ भनिन् र बच्चोलाई कोलाहा कोलाहा भन्दै फकाउन थालिन् ।

 

एउटा परिवार मोटरसाइकलमा सवार थियो । आमा, बाबु र सानो बच्चा । आफ्नै साइडमा विस्तारै जाँदै थियो त्यो परिवार । एक्कासी कतैबाट एउटा युवक मोटरसाइकलमा ‘जिग ज्याक’ हान्दै आयो । त्यो परिवारको अगाडि बाँकटे हान्दै गोली आए झैं आयो र अलप भयो । बाबुले उक्त धुन्धकारी मोटरसाइकल चाकलबाट जोगिन झ्याप्प ब्रेक हाने । एक्कासी ब्रेक हान्दा मोटरसाइकलले सन्तुलन गुमायो र पर्लक्क पल्टियो । परिवार जसोतसो उठेर लुगामा लागेको धूलो झार्न थाल्यो । त्यतिबेलासम्म त्यो धुन्धकारी ५ किलोमिटर पर पुगिसकेको हुँदो हो !

 

यस्ता घटना नेपालका सहरी क्षेत्रमा दैनिक देखिइरहन्छन् । अपूरो ट्राफिक नियम र अनुगमन प्रभावकारी नहुँदा यस्ता गैरजिम्मेवार मोटरसाइकल चालकहरु कारबाहीको दायरामा पर्ने गरेका पनि थिएनन् ।

 

यो अवस्थामा अब केही परिर्वतन आउने संकेत देखिन थालेको छ । यस्ता गैरजिम्मेवार चालकहरुलाई अहिले ट्राफिक प्रहरीले कारबाहीमा तीव्रता दिन थालेको छ ।

 

महानगरीय ट्राफिक प्रहरी महाशाखाले विगत १ महिनादेखि ठूला आवाज तथा स्वरुप परिवर्तन गरेर मोटरसाइकल चलाउने चालक उपर विशेष अप्रेशन नै चलाई धमाधम कारबाही गरेको छ । महाशाखाले यसअवधिमा चर्को आवाज निकाल्ने ३४२ वटा मोटरसाइकलहरुलाई कारबाही गरेको जनाएको छ ।

 

महाशाखाका प्रमुख प्रहरी वरिष्ठ उपरीक्षक जनक भट्टराईले त्यस्ता मोटरसाइकलका कारण दुर्घटना निम्तिनुका साथै सर्वसाधरणमा अनावश्यक आवाजका कारण आतंकित तुल्याउने र ध्वनि प्रदूषण हुने भएकाले कारबाही गरिएको जानकारी दिए ।

 

जथाभावी रूपमा साइलेन्सरलाई मोडिफाई गरेर, फिल्टर निकालेर वा कम्पनीबाट नै ठूलो आवाज निस्कने बनाइएका मोटरसाइकललाई उपत्यकाभित्र सञ्चालनमा कडाइ गरेको महाशाखाले जनाएको छ ।

 

महाशाखाले मोटरसाइकलहरुले ध्वनी प्रदूषण हुने गरी शहरमा कोलाहल मच्चाउँदै ठूलो आवाजले गुडाउने, स्वरुप परिवर्तन गरी चलाउने, लापरबाही ढङ्गले चलाउने, जिकज्याक रूपमा चलाउने कार्यहरु कानून विपरीत भएकोले कारवाही गरेको हो ।

 

यस्ता गलत गरी चलाउने मोटरसाइकलको विभिन्न माध्यमबाट नम्बर संकलन गर्नुका साथै निग्ररानीमा राखिएको महाशाखाले जनाएको छ । यस्ता किसिमका मोटरसाईकलहरू कतै गुडिरहेको देखेमा ट्राफिक प्रहरीको हटलाईन १०३ मा जानकारी गराउन सम्पूर्ण नागरिकहरूमा महाशाखाले विशेष अनुरोध समेत गरेको छ ।

Advertisement Section