काठमाडौं । नेपाल राष्ट्र बैंकले सेयर धितो कर्जामा कडाइ गरेको छ ।
राष्ट्र बैंकले मौद्रिक नीतिको त्रैमासिक समीक्षालाई कार्यान्वयन गर्न बैंक तथा वित्तीय संस्थाहरुलाई एकीकृत निर्देशन जारी गर्दै सेयर धितो कर्जामा कडाइ गरेको हो ।
नयाँ व्यवस्था अनुसार अब बैंक तथा वित्तीय संस्थाले पछिल्लो ३ वर्षदेखि लगातारमा नोक्सानीमा रहेका, व्यवसायिक रुपमा सञ्चालनमा आएको १ वर्ष पूरा नभएका, विगत ३ वर्षदेखि साधरणसभा नगरेका, कम्तीमा २५० दिनको कारोबार मूल्य नभएको संस्थाहरुको सेयर धितोमा कर्जा प्रवाह गर्न नपाउने भएका छन् ।
यस्तै, बैंकहरुले धितोको रुपमा लिने संस्थाको मूल्य आम्दानी अनुपात, प्रतिसेयर आम्दानी, पीबी भ्यालु, लाभांश इल्ड, लाभांश अनुपात जस्ता आधारभूत सूचकांकको विश्लेषण सम्बन्धी व्यवस्था गर्नुपर्नेछ ।
राष्ट्र बैंकका अनुसार समस्याग्रस्त घोषणा भएका वा निर्देशन बमोजिम पूँजी कोष अनुपात कायम नगरेका बैंक तथा वित्तीय संस्थाहरु, नेटवर्थ ऋणात्मक भएका संस्थाहरु, सूचीकरणबाट हटाइएका संस्थाहरु तथा आर्थिक वर्ष समाप्त भएको १ वर्ष अवधि पूरा हुँदा समेत अन्तिम लेखा परीक्षण नगर्ने संस्थाहरुको सेयर धितोमा कर्जा दिन पाउने छैनन् ।
यद्यपि, राष्ट्र बैंकलेसेयर धितो मूल्यांकन र त्यसको आधारमा दिन मिल्ने कर्जा सीमामा भने कुनै परिवर्तन भएको छैन । यस वर्षको मौद्रिक नीतिले सेयर धितो मूल्यांकन गर्दा पछिल्लो १२० दिनको कारोबारको औसत मूल्यमा ७० प्रतिशतसम्म ऋण दिन मिल्ने व्यवस्था गरेको थियो ।
