काठमाडौं । सेयर बजारमा ठूलो गिरावट आएको छ । हिजो ९ अंकले घटेको बजारमा आज उच्च अंकले घटेको छ ।
आइतबार एकैदिन १२३ अंकले घटेको बजार सोमबार करिब ७३ अंकले कमब्याक गरे पनि त्यसयता लगातार गिरावट आएको हो । यो साताको चार कारोबार दिनमा मात्रै समग्रमा नेप्से करिब १०० अंकले घटिसकेको छ ।
गत साता राष्ट्र बैंकले मौद्रिक नीतिको समीक्षा गर्दै सेयर धितो कर्जामा कडाइ गर्ने जनाएसँगै लगानीकर्ताको मनोबल गिर्दा बजारले ओरालो यात्रा तय गरेको लगानीकर्ता बताउँछन् ।
तिहारपछि लगातार बढेको बजारमा यससाता ठूलो गिरावट आएको हो । सूचकसँगै कारोबार रकम पनि दैनिक घट्दै गएको छ । गतसाता औसतमा दैनिक ८ अर्बको कारोबार हुँदै आएकोमा यस साता घटेर ५ अर्ब हाराहारीमा आइपुगेको छ ।
बजारमा ठूला लगानीकर्ता प्रफिट बुक गरेर बाहिरिएसँगै बजारमा कारोबार पनि ह्वात्तै घटेको आकलन गरिएको छ । यद्यपि दैनिक ५ अर्ब कारोबार हुनुले अझै बजार लयमै रहेको अनुमान गर्न सकिन्छ ।
सेयर बजार मापक सूचक नेप्से ३९.६० अंकले घटेर १९५५.७५ विन्दुमा आइपुगेको छ । यसदिन २०१ कम्पनीको १ करोड ८ लाख २१ हजार ९७२ कित्ता सेयर ४ अर्ब ७४ करोड ५६ लाख ४९ हजार २९१ रुपैयाँमा कारोबार भएको छ ।
कारोबारमा आएका १२ वटा समूहमध्ये जलविद्युत बाहेक अन्य सबै समूहको परिसूचक राताम्मे भएका छन् । आज जलविद्युत् समूहको परिसूचक २२.८९ अंकले बढेको छ भने जीवन बीमा समूह २७०.४६ अंकले घटेको छ ।
आज कारोबार भएका कुल २०१ कम्पनी मध्ये ३९ कम्पनीको मूल्य बढेको छ भने १५४ कम्पनीको मूल्य घटेको छ । ८ कम्पनीको मूल्य भने स्थिर रहेको छ ।
आज पनि लगानीकर्ता नेपाल पुनर्बीमा कम्पनीको सेयरमा झुम्मिएका छन् । यससाता सर्वाधिक कारोबार हुँदै आएको कम्पनीको आज ४२ करोड ४२ लाख रुपैयाँ बढीको कारोबार भएको छ ।
कारोबार रकमकै आधारमा अपर तामाकोशी २५ करोड र अरुण काबेली २३ करोड सहित क्रमशः दोस्रो र तेस्रोमा रहे ।
घट्दो बजारमा पनि आज दुई कम्पनीको सेयर मूल्यमा पोजेटिभ सर्किट लागेको छ । नारायणी डेभलपमेन्ट बैंक र साञ्जेन हाइड्रोपावरका सेयरधनीले करिब १० प्रतिशत कमाएका छन् ।
हाइड्रोपावर समूह बढे पनि आज अरुण भ्याली हाइड्रोपावरका सेयरधनीले सबैभन्दा धेरै ५.५६ प्रतिशत गुमाएका छन् ।
