काठमाडौं। बिभिन्न समाचार र हल्लाहरुको कारणले हिजो ठूलो अंकले घटेको बजार आज फेरी आफ्नै लयमा फर्र्किएको छ । हिजो ६ प्रतिशत घट्दै सर्किट लागेर बन्द भएको बजारमा आज ३.७४ अंकको सुधार आएको छ । हिजो १२३ अंकले घटेको बजारमा आज ७२.२८ अंकको सुधार आएको हो ।
हिजो सबै उप–सूचकका प्राय सबै कम्पनीका सेयर मूल्यमा पहिरो नै गएको थियो । तर, आज फेरी सबै उप–सूचकहरु बढेका छन् भने एकाध कम्पनीको मात्र सेयर मूल्य घटेको छ । विगतका दिनहरुको तुलनामा आज कारोबार रकम भने केही घटेको छ । ८–९ अर्बको दैनिक कारोबार भइरहेको बजारमा आज ६ अर्ब ६७ करोड रुपैयाँको मात्र कारोबार भएको छ ।
दैनिक उच्च कारोबार हुन थालेपछि बैंकका कर्जा सबै सेयर बजारमा मात्र आएको आशंका गर्दै केही दिन अघि राष्ट्र बैंकले सेयर कर्जामा पुनरावलोकन गर्ने बताएको थियो । तर, अहिले त्यो अध्ययनको क्रममै रहेकाले कति घटाउने वा नघटाउने निर्णय भने भएनसकेको राष्ट्र बैंकले स्पष्ट पारेको थियो ।
राष्ट्र बैंकको पछिल्लो अभिव्यक्ति सँगै लगानीकर्ताहरुको आत्मविश्वास फेरी फर्किएको देखिएको छ ।
आज आधा दर्जन कम्पनीको सेयर मूल्य करिब १० प्रतिशतले बढेको छ भने अत्याधिक चर्चा कमाएका कम्पनीहरु पूर्नबीमा र शिभम सिमेन्टको पनि सेयर मूल्य क्रमश ६८ र ७२ रुपैयाँ प्रति कित्ताले बढेको छ ।
आज सबैभन्दा बढि लाइफ इस्योरेन्स सेक्टर ६.०४ प्रतिशतले बढेको छ भने हाइड्रो ५.९९ र उत्पादन ५.०९ प्रतिशतले बढेका छन् । यसैगरी माइक्रोफाइनान्स र नन लाइफ उप–सूचक पनि ४.३० र ५.३४ प्रतिशतले बढेका छन् ।
बैंकिङ र विकास बैंक पनि क्रमश २.२३ र २.०२ प्रतिशतले बढेका छन् भने फाइनान्स र होटल पनि क्रमश २.३६ र ३.०५ प्रतिशतले बढेका छन् ।
आजको बजारको गति हेर्दा अब बजार केही सय अंक बढ्ने र त्यसपछि मात्र अलि ठूलो करेक्सन आउने लगानीकर्ताहरु बताउन थालेका छन् ।
