काठमाडौं । प्रभु लाइफ इन्स्योरेन्सले मंसिर २९ गतेदेखि प्राथमिक साधरण सेयर (आइपीओ) निष्काशन गर्ने भएको छ ।
कम्पनीले प्रतिकित्ता अंकित मूल्य १०० रुपैयाँका दरले ६० करोड रुपैयाँ बराबरको ६० लाख कित्ता सेयर सर्वसाधारणका लागि जारी गर्न लागेको हो ।
निष्काशन हुने कुल ६० लाख कित्तामध्ये ३ लाख कित्ता कर्मचारी र ३ लाख कित्ता सामूहकि लगानी कोषका लागि छुट्याइएको छ । बाँकी ५४ लाख कित्ताका लागि सर्वसाधारणले आवेदन दिन सक्नेछन् ।
कम्पनीको आइपीओमा पुस २ गतेसम्म आवेदन दिन पाइनेछ । उक्त समयमा सबै सेयर विक्री नभएमा भने पुस १३ गतेसम्म आवदन दिन सकिनेछ ।
लगानीकर्ताले न्यूनतम १० कित्तादेखि अधिकतम ५ हजार कित्ताका लागि आवेदन दिन पाउनेछन् । कम्पनीको आइपीओ विक्री प्रबन्धकमा सिद्धार्थ क्यापिटल रहेको छ ।
हाल १ अर्ब ४० करोड चुक्ता पूँजी रहेको इन्स्योरेन्सले बीमा समितिले तोकेको न्यूनतम चुक्ता पूँजी २ अर्ब रुपैयाँ पुर्याउन आइपीओ जारी गर्न लागेको हो ।
वित्तीय विवरणको कुरा गर्दा नेपालको क्रेडिट रेटिङ एजेन्सी इक्रा नेपालले प्रभु लाइफलाई ४ को रेटिङ दिएको छ । यसले कम्पनीको आधारभूत वित्तीय अवस्था औसत भन्दा कम रहेको संकेत गर्दछ ।
काठमाडौंको कमलादीमा प्रधान कार्यालय रहेको प्रभु लाइफ सन् २०१७ देखि सञ्चालनमा आएको हो । कम्पनीको प्रमोटरमा बैंकहरु, मचेन्ट बैंकहरु, लगानी व्यवस्थापन कम्पनीहरु, बीमा कम्पनीहरु र केही व्यक्तिगत लगानीकर्ताहरु समेत रहेका छन् ।
अहिलेसम्म कम्पनीका १ सय हाराहारी शाखा कार्यालयहरु रहेका छन् भने झण्डै ७ हजार एजेन्टहरु समेत छन् । कम्पनीका करिब २० कर्पोरेट एजेन्टहरु समेत रहेका छन् ।
यस्तो छ वित्तीय अवस्था
इन्स्योरेन्सले चालू आर्थिक वर्षको पहिलो त्रैमासमा खुद मुनाफा १५३.२७ प्रतिशतले बढाएको छ । कम्पनीले असोज मसान्तसम्ममा ३ करोड ९ लाख रुपैयाँ खुद मुनाफा कमाएको छ । यो गत आवको सोही अवधिको तुलनामा १ करोड ८६ लाख रुपैयाँले बढी हो । कम्पनीले गत आवको पहिलो त्रैमासमा १ करोड २२ लाख रुपैयाँ खुद नाफा कमाएको थियो ।
समीक्षा अवधिमा इन्स्योरेन्सले २५ करोड ९७ लाख रुपैयाँ खुद बीमाशुल्क आर्जन गरेको छ । यो गत आवको सोही अवधिको तुलनामा १२ करोड ६८ लाख रुपैयाँले बढी हो । इन्स्योरेन्सले गत आवको पहिलो त्रैमासमा १३ करोड २९ लाख रुपैयाँ खुद बीमाशुल्क आर्जन गरेको थियो ।
समीक्षा अवधिसम्म कम्पनीले २२ हजार ५९४ वटा बीमालेख जारी गरी २५ करोड ९७ लाख रुपैयाँ कुल बीमाशुल्क आर्जन गरको छ । यस अवधिमा इन्स्योरेन्सले १७५ वटा दाबी बापत ६१ करोड ६८ लाख रुपैयाँ भुक्तानी गरेको छ भने २ वटा दाबी वापत ४१ लाख रुपैयाँ भुक्तानी गर्न बाँकी छ ।
हाल १ अर्ब ४० करोड रुपैयाँ रहेको इन्स्योरेन्सको जगेडा कोषमा २३ करोड ९१ लाख रुपैयाँ, जीवन बीमा कोषमा १ अर्ब १९ करोड ४९ लाख रुपैयाँ र महाविपत्ती जगेडामा १ करोड ५४ लाख रुपैयाँ सञ्चित छ ।
कोरोना संक्रमणका बाबजूद कम्पनीले राम्रो व्यवसाय विस्तार गरेको देखिएको छ । यस्तो प्रतिकूल अवस्थालाई चुनौतीका साथै अवसरको रुपमा समेत लिएर व्यवसायलाई अघि बढाउने रणनीति रहेको कम्पनीले जनाएको छ ।
