काठमाडौं । सेयर बजारले दिनदिनै नयाँ रेकर्ड बनाएको छ । आज बजार खुलेको १ घण्टामा बजार सूचक नेप्से करिब ४० अंकले बढेर २००० विन्दु पार गरको छ । यो अहिलेसम्मकै उच्च विन्दुको रेकर्ड हो ।
सूचकसँगै कारोबार रकमले पनि नयाँ रेकर्ड कायम गरेको छ । सेयर बजार इतिहासमै १ घण्टामै २ अर्ब ७१ करोड रुपैयाँ बराबरको कारोबार भएको छ । यो नेपाली सेयर बजारमा अहिलेसम्म एक घण्टामै भएको सबैभन्दा धेरै कारोबार हो ।
यसआधारमा प्रतिमिनेट औसतमा ४ करोड ७१ रुपैयाँ बराबरको कारोबार भएको छ भने प्रतिसेकेन्ड औसतमा करिब ७ लाख ८५ हजार रुपैयाँ कारोबार भएको छ । गत वर्ष पुस/माघ तिर दैनिक औसतमा जम्मा १५ देखि २० करोड कारोबार हुने गर्थ्यो ।
पछिल्ले समय बैंकिङ प्रणलीमा अधिक तरलता कायम भई ब्याजदर सस्तो भएपछि लगानीकर्ता उत्साहित हुँदा बजारले नयाँ रेकर्ड बनाउने बाटोमा गएको जनाकारहरु बताउँछन् । साथै, पछिल्लो समय सेयर बजार प्रविधिमैत्री हुनु, नयाँ लगानीकर्ताको प्रवेश, कोरोनाका कारण अन्य क्षेत्रमा लगानी विस्तार हुन नसक्नु लगायत कारले बजारलाई नयाँ उचाइमा पुर्याएको उनीहरुको भनाइ छ ।
