काठमाडौं । काठमाडौं उपत्यकामा करिब २ दर्जन पार्क बन्ने भएका छन् । उपत्यका विकास प्राधिकरण अन्तर्गत ८ वटा पार्क बन्ने क्रममा रहेका छन् भने थप १३ वटा पार्क बनाउने योजना अघि सरेको छ ।
प्राधिकरण अन्तर्गत जिल्ला आयुक्त कार्यालयले ८ वटा पार्क बनाइरहेको हो । सो पार्क मध्ये ३ वटा पार्क निर्माणको अन्तिम चरणमा रहेको जिल्ला आयुक्त कार्यालयका इन्जिनीयर रवि शर्माले बताए ।
जिल्ला आयुक्त कार्यालयले २०७५/७६ बाट बहुवर्षे आयोजना अन्तर्गत ८ वटा पार्कहरु उपत्यका भित्र बनाइरहेको हो । गत वर्ष निर्माण सम्पन्न हुनु पर्ने धेरै पार्कहरु कोभिडका कारण रोकिएका छन् ।
गत वर्ष बन्ने क्रममा रहेका ८ वटा पार्कहरु मध्ये उनले ८ वटा मध्ये ५ वटा पार्क निर्माणाधिन अवस्थामा रहेको बताए । कोभिड १९ का कारण सो पार्कहरु निर्माणमा ढिलाइ भएको उनले जानकारी दिए ।
‘कोभिडका कारण २/३ वटा पार्कहरुमा असर परेको हो । वासिन्दाहरुले कोरोना सर्ने भन्दै मजदुरहरुलाई निर्माण स्थलमा गएर काम गर्न दिएन्न्,’ इन्जिनियर शर्माले चाणक्य पोष्टसँग भने ।
कोभिडकै कारण निर्माणमा ३ महिना काम ठप्प भएको थियो । कोभिडका कारण शुरुवाति समयमा बुढानिलकण्ठ, खुसिबु, नरेफाँटमा बन्ने क्रममा रहेका पार्कहरुमा काम गर्न असहज भएको थियो ।
बाँकी रहेका ५ पार्कहरु ७ महिनाको अवधिमा सम्पन्न हुने इन्जिनीयर शर्माले बताए । सो मध्ये ३ वटा पार्कको भौतिक प्रगति ९० प्रतिशत रहेको छ भने २ वटा पार्कको भौतिका प्रगति ६०/७० प्रतिशतका हाराहारीमा रहेको छ ।
बुढानीलकण्ठमा ४ वटा पार्क निर्माणाधीन अवस्थामा रहेको छ । तीमध्ये २ वटा पार्क निर्माण सम्पन्न भइसकेको छ । बाँकी दुई वटा मध्य एउटाको ९० प्रतिशत काम सकिएको छ भने अर्कोको ६० प्रतिशत भौतिक प्रगति भएको छ ।
सो पार्कहरु एउटा साडे ४ रोपनीको क्षेत्रफलमा फैलिएको छ । अर्को १६ रोपनीको रहेको छ भने २ वटा साढे ५ रोपनी क्षेत्रफलमा फैलिएको जनाइएको छ ।
१६ रोपनीमा बन्दै गरेको पार्क १ महिना भित्र पूरा गरी हस्तान्तरण गरिने इन्जिनीयर शर्माले बताए । साढे ५ रोपनीको एउटा पार्क निर्माण सकिसकेको छ ।
मूलपानीको वडा नम्बर १० मा १९ रोपनीमा पार्क निर्माण पूरा भइसकको छ । बालुवाखानी वडा नम्बर १० मा साढे ५ देखि ६ रोपनी जग्गामा पार्क बन्ने क्रममा रहेको छ ।
नरेफाँटमा मनहरा कोरिडरसँगै २१ रोपनी क्षेत्रफलमा पार्क बन्दै छ । अबको ४ महिनामा सो पार्क निर्माण पूरा हुने छ । उक्त पार्कमा भौतिक काम सकिसकेको छ । अन्य रंरोगन र ब्यूटिफिकेसनका कामहरु भइरहेको छ ।
खुसीबुमा ६ रोपनी क्षेत्रफलमा पार्क बन्दै छ । सो पार्कको ६० प्रतिशत काम पूरा भइसकेको छ । उक्त पार्क अबको ३ महिनामा पूरा हुने प्राधिकरणले जनाएको छ ।
बुढानिलकण्ठ वडा नम्बर ८ मा २१ रोपनिमा पार्क बन्दै छ । त्यो पार्क अबको ७ महिनामा पूरा हुने छ । यसको भौतिक प्रगति ५० प्रतिशत रहेको छ । हालसम्म पार्क पार्क बनाउने क्रममा ८ करोड रुपैयाँ खर्च भइसकेको छ ।
यस्तै चालू आर्थिक वर्षमा उपत्यका भित्र थप १३ वटा पार्क बन्ने योजना रहेको छ । पार्क निर्माण हाल अध्ययनका क्रममा रहेको छ । १३ वटा मध्ये २/३ वटा पार्कको अध्ययन जिल्लाहरुबाट भइरहेको इन्जिनीयर शर्माले बताए । सो पार्क अध्ययन १ महिनामा पूरा हुने छ । अध्ययन लगतै लागत आउने छ । त्यसपछि ठेक्का आवहान तर्फ लागिने छ ।
साथै काठमाडौं वडा नम्बर ४ र ५ मा पब्लिक ल्याण्ड छुट्याएर नगरपालिकालाई पार्क बनाउन दिइएको छ । काठमाडौं महानगरपालिकाले चालू आर्थिक वर्षमा ३० वटा पार्क बनाउने निर्णय गरेको छ । सो पार्क निर्माणका लागि मात्रै महानगरपालिकाले २७ करोड भन्दा बढी बजेट विनियोजन गरिएको छ ।
