काठमाडौं । पछिल्लो समय निरन्तर उकालो लागेको सेयर बजार साढे ३ वर्ष वर्ष यताकै उच्च विन्दुमा पुगेको छ ।
सूचकसँगै कारोबार रकम पनि निरन्तर बढ्दै गएको छ । आज नेपाली सेयर बजारको इतिहासमै दोस्रो धेरै ४ अर्ब ८२ करोड रुपैयाँ बढीको कारोबार भएको छ ।
यसअघि गत फागुन १८ गते इतिहासकै धेरै ४ अर्ब ८४ करोड ७४ लाख ३७ हजार ५०५ रुपैयाँको कारोबार भएको थियो ।यसा साताका ५ दिनमा मात्रै नेप्से परिसूचक करिब ८० अंकले बढेको छ भने असार यता करिब ५०० अंकले बढेको छ ।
बढ्दो बजारमा लगानीकर्ता ठूला कम्पनीको सेयरमा आकर्षित भएका छन् । बजारका ठूला नेपाल टेलिकम, पुनर्बीमा कम्पनी, नेपाल लाइफ इन्स्योरेन्स, नागरिक लगानी कोष लगायत ठूला कम्पनीको सेयर कारोबार बढ्दै गएको छ ।
सेयर बजार मापक सूचक नेप्से १०.८२ अंकले बढेर १७१८.५० विन्दुमा पुगेको छ । यसदिन १९८ कम्पनीको १ करोड २३ लाख ३५ हजार ५५६ कित्ता सेयर ४ अर्ब ८२ करोड ६२ लाख ८६ हजार ५५१ रुपैयाँमा कारोबार भएको छ । यससाता लगातार ४ अर्ब बढीको कारोबार भएको आज तेस्रो दिन हो ।
कारोबारमा आएका १२ वटा समूहमध्ये ५ समूहको परिसूचक उकालो लागेका छन् भने ७ समूहको परिसूचक घटेको छ । व्यापार समूहको परिसूचकमा पोजेटिभ सर्किट लागेको छ । यस समूहको परिसूचक १६४.७१ अंकले बढेको छ । आज उत्पादनमूलक समूहको परिसूचक सबैभन्दा धेरै ३०.४६ अंकले घटेको छ ।
आज लगानीकर्ता नेपाल पुनर्बीमा कम्पनीको सेयरमा झुम्मिएका छन् । यस साता उच्च कारोबार हुँदै आएको पुनर्बीमाको आज सबैभन्दा धेरै २८ करोड ५५ लाख रुपैयाँभन्दा बढीको सेयर किनबेच भएको छ । कारोबारकै नेपाल टेलिकम र प्रभु बैंकको सेयर क्रमशः दोस्रो र तेस्रो स्थानमा रहे ।
बढ्दो बजारमा आज २ कम्पनीको सेयर मूल्यमा पोजेटिभ सर्किट लागेको छ । साल्ट्र ट्रेडिङ र विशाल बजार कम्पनीका सेयरधनीले १० प्रतिशत कमाएका छन् ।यस्तै, नाडेप लघुवित्त, नेपाल टेलिकम र सबैको लघुवित्तको पनि सेयर मूल्य ५ प्रतिशभन्दा धेरैले बढेको छ ।
दोहोरो अंकले बढेको बजारमा गणपति माइक्रो फाइनान्सका लगानीकर्ताले भने सबैभन्दा धेरै ५.२३प्रतिशतले गुमाएका छन् ।
