चीनको अलिबाबा ग्रुपको कम्पनी ‘एन्ट ग्रुप’ले विश्वको अहिलेसम्मकै ठूलो आइपीओ निष्काशन गर्न अनुमति पाएको छ ।
चिनियाँ अर्बपति ज्याक माको कम्पनी एन्ट ग्रुपलाई ३० अर्ब डलर (करिब साढे ३५ खर्ब रुपैयाँ)को आइपीओ निष्काशन गर्न चीनको धितोपत्र नियामक आयोगले अनुमति दिएको हो ।
यो आइपीओ विश्वमै अहिलेसम्म निष्काशन भएको सबैभन्दा ठूलो आइपीओ हुनेछ । यसअघि गत डिसेम्बरमा साउदी आरामकोले २९.४ अर्ब डलरको आइपीओ निष्काशन गरेको थियो ।
आइपीओ पश्चात कम्पनीको सेयर एकैपटक हङकङ र साङघाइको सेयर बजारमा सूचीकृत हुने भएको छ । यसरी एकैपटक दुर्ईवटा स्टक एक्सचेन्जमा कुनै कम्पनी सूचीकृत हुन लागेको यो पहिलो अवसर हो ।
एन्ट ग्रुप विश्वकै ठूलो ‘फिन टेक’ कम्पनी हो । यो ग्रुपले विश्वकै ठूलो मोबाइल र अनलाइन पेमेन्ट प्लेटर्फम ‘अलि पे’ सञ्चालन गर्छ । यसका अलवा यो ग्रुपले थर्ड पार्टी क्रेडिट सिस्टम ‘सिसम क्रेडिट’ पनि सञ्चालन गर्दछ ।
चिनियाँ नियामकहरू यो कम्पनीको वृद्धिका लागि फण्ड जुटाउन मद्दत पुर्याउनका लागि लागिपरेका छन् भने लगानीकर्ताहरू पनि सेयर किन्न लालायित भइरहेका छन् ।
महामारीको यो समयले कम्पनीहरूको पूँजी संकलन गर्ने तरिकामा ठूलो परिर्वतन गर्न बाध्य पारेको छ । यसको आकारले गर्दा एन्टको आइपीओले डिजिटाइजेशनको डिललाई नयाँ उचाइमा लैजाने बताइएको छ ।
अहिलेको अवस्थामा एन्टको मूल्याङ्कन २३० अर्ब डलर देखि २५० अर्ब डलरसम्म रहेको मानिएको छ । प्रि आइपीओका लगानीकर्ताले यो कम्पनीको मूल्याङ्कन ३०० अर्ब डलरसम्म गरेका छन् ।
एन्टको आइपीओको सबैभन्दा चुनौतीपूर्ण पक्ष भनेको दुईवटा स्टक एक्सचेन्जमा एकैपटक सूचीकृत गर्नका लागि स्वीकृति पाउनु रहने छ । लगानीकर्ताहरूसँग अझ राम्रो डिल गर्नका लागि एन्टले दुर्ईवटा स्टक एक्सचेन्जमा एकैपटक सूचिकृत हुन चाहेको हो । यो नयाँ प्रयोगले आइपीओ निष्काशनको समय केही लम्ब्याएको छ ।
यसका अलावा नियामकहरू कम्पनी प्रति अलिबाबा र ज्याक माको जवाफदेहीताको बारेमा प्रष्ट हुन चाहिरहेका छन् । यो पेमेन्ट प्रणालीमा केही समस्या आएमा भरपर्दो जवाफदेहीताको खोजी उनीहरू गरिरहेका छन् ।
