काठमाडौं । नेपाल स्टक एक्सचेन्ज (नेप्से)ले वार्षिक् नवीकरण शुल्क नबुझाउने २५ कम्पनीलाई कारबाही गरेको छ ।
आर्थिक वर्ष सकिएको ३ महिनाभित्र नवीकरण शुल्क बुझाउनु पर्ने कानूनी व्यवस्था अनुसार छ । त्यसलाई वेवास्ता गर्दै शुल्क नबुझाउने २५ कम्पनीलाई नेप्सेले कारबाही गरेको हो ।
कारबाहीमा पर्ने कम्पनीहरुमा १४ उत्पादनमूलक कम्पनी, ६ वटा फाइनान्स कम्पनी, ३ हाइड्रो कम्पनी र १/१ वटा होटल र अन्य समूहका कम्पनी रहेका छन् ।
कुल २५ कम्पनीको सेयर कारोबार रोक्का गरिएको भए पनि ५ वटा कम्पनी मात्र नियमित कारोबार हुने गर्दछन् । नेप्सेले दोस्रो बजारमा नियमित कारोबार हुने मल्टीपर्पोज फाइनान्स, हिमाल दोलखा हाइड्रोपावर, जोशी हाइड्रोपावर, नेपाल हाइड्रो डेभलपर र हिमालय डिष्टिलरीको सेयर कारोबार रोक्का गरेको हो ।
धितोपत्र सूचीकरण विनियमावली २०७५ अनुसार ५० करोड रुपैयाँसम्मको चुक्ता पूँजी भएका कम्पनीले ५० हजार रुपैयाँ र ५० करोडभन्दा माथि चुक्ता पूँजी रहेको कम्पनीले १ लाख रुपैयाँ वार्षिक नवीकरण शुल्क तिर्नुपर्ने व्यवस्था छ ।
