काठमाडौं । सानिमा जनरल इन्स्योरेन्सको प्राथमिक साधरण सेयर (आइपीओ) बाँडफाँट भएको छ ।
विक्री प्रबन्धक एनआइसी एशिया क्यापिटलमा आज बिहान भएको बाँडफाँट अनुसार २ लाख ७३ हजार जना भाग्यशाली आवेदकले १० कित्ताका दरले सेयर पाएका छन् भने ५ लाख ९० हजार ५४५ जनाको हात रित्तो भएको छ ।
क्यापिटलका अनुसार कम्पनीको आइपीओमा कुल ८ लाख ६६ हजार ९०५ जनाले आवेदन दिएका थिए । तीमध्ये ३ हजार ३६० आवेदन रद्द भएको थियो ।
कम्पनीको आइपीओमा हालसम्मकै धेरै कीर्तिमानी आवेदन परेको थियो । यसअघि जनरल इन्स्योरेन्सको सबैभन्दा धेरै ७ लाख ९४ हजार बढीले आवेदन दिएका थिए ।
कम्पनीले असोज २१ गतेदेखि अंकित मूल्य १०० रुपैयाँमा ३० करोड रुपैयाँ बराबरको ३० लाख कित्ता आइपीओ विक्री खुला गरेको थियो ।
कम्पनीले निष्काशन गरेको ३० लाख कित्तामध्ये १ लाख ५० हजार कित्ता (५ प्रतिशत) सामूहिक लगानी कोष र १ लाख २० हजार कित्ता (४ प्रतिशत) कम्पनीका कर्मचारीका लागि छुटयाएको छ। बाँकी २७ लाख ३० हजार कित्ता सेयरका लागि सर्वसाधरणका लागि छुट्याइएको थियो ।
