काठमाडौं । नाडेप लघुवित्त वित्तीय संस्थाले यही असोज २८ गते पाँचौ वार्षिक साधारण सभा बोलाएको छ ।
लघुवित्तले आर्थिक वर्ष २०७५/७६ को मुनाबाट प्रस्ताव गरेको १०.५२ प्रतिशत लाभांश पारित गर्न साधारण सभा डाकेको हो । लघुवित्तको सो सभा रानीबन पार्टी एण्ड रेष्टुराँ, नागार्जुन, काठमाडौंमा बिहान ११ बजे शुरु हुनेछ।
सो साधरण सभाबाट चुक्ता पूँजी वृद्धि गर्न बोनस सेयर वितरण गर्ने प्रस्ताव पारित गर्ने लघुवित्तले जनाएको छ । हाल ३६ करोड ८० लाख रुपैयाँ चुक्ता पूँजी रहेको कम्पनीले १० प्रतिशतका दरले हुन आउने रकम ३ करोड ६८ लाख रुपैयाँ बराबरको बोनस सेयर वितरण गरी चुक्ता पूँजी ४० करोड कायम गर्ने भएको हो । साथै कर प्रयोजनार्थ ०.५२६ प्रतिशत नगद लाभांश वितरण गर्ने प्रस्ताव पनि लैजाने भएको छ ।
यस्तै, साधरण सभामा सेयर संरचना परिवर्तन गरी ५१:४९ कायम गर्ने, मर्जर तथा एक्विजिसनसम्बन्धि सम्पूर्ण कार्य गर्न सञ्चालक समितिलाई अख्तियारी दिने लगायतका प्रस्ताव लैजाने भएको छ ।
साधारण सभा प्रयोजनका लागि लघुवित्तले असोज १४ गते एक दिनका लागि बुकक्लोज मिति तोकेको छ । तसर्थ, असोज १३ गतेसम्म नेप्सेमा कारोबार भइ कायम रहेका सेयरधनीले प्रस्तावित लाभांश पाउन योग्य र साधारण सभामा सहभागिता जनाउन सक्नेछन्।
