काठमाडौं । नागरिक लगानी कोषले हकप्रद सेयर निष्काशनका लागि अनुमति माग्दै नेपाल धितोपत्र बोर्डमा निवेदन दिएको छ ।
कोषले १००:८२ अनुपातमा हकप्रद सेयर निष्काशन गर्न अनुमति माग्दै सोमबार बोर्डमा निवेदन दिएको हो ।लगानी कोषले प्रतिसेयर १०० रुपैयाँ दरले १ अर्ब ३५ करोड ९२ लाख ५९ हजार २०० रुपैयाँ बराबरको १ करोड ३५ लाख ९२ हजार ५९२ कित्ता हकप्रद सेयर निष्काशन गर्न लागेको हो ।
उक्त हकप्रद सेयर निष्काशन तथा बिक्री प्रबन्ध सेवाका लागि आरबीबी मर्चेण्टलाई नियुक्त गरिसकेको छ । हाल चुक्ता पूँजी १ अर्ब ६४ करोड रुपैयाँ रहेको कोषको हकप्रद बिक्री गरेपछि कोषको चुक्ता पूँजी ३ अर्ब पुग्नेछ ।
हकप्रद निष्काशनका लागि आवेदन दिएसँगै नागरिक लगानी कोषको सेयरमा लगानीकर्ता झुम्मिएका छन् । पछिल्लो ४ दिनमा कम्पनीको सेयर मूल्य प्रतिकित्ता ६०० रुपैयाँले बढेको छ । गत बिहीबार २९०३ रुपैयाँ कारोबार बन्द भएको कम्पनीको सेयर आज प्रतिकित्ता ३५९५ रुपैयाँमा कारोबार भइरहेको छ ।
