काठमाडौं । शिखर इन्स्योरेन्सको हकप्रदमा नबिकेको ८७ हजार ४१२ कित्ता सेयर आजदेखि लिलामीमा आएको छ ।
इन्स्योरेन्सले गत असार १४ गतेदेखि साउन ४ गतेसम्म निष्काशन गरेको हकप्रदमा नबिकेको सेयर लिलामीमार्फत बिक्री गर्न लागेको हो ।
कम्पनीले ३१ लाख ७१ हजार ९३२ कित्ता हकप्रद जारी गरेको थियो । जसमा ३० लाख ८४ हजार ५१९ कित्ता बिक्री भएको थियो भने ८७ हजार ४१२ कित्ता बिक्री हुन सकेको थिएन ।
कम्पनीको लिलामीमा आएको सेयरमा २८ गतेसम्म आवेदन गर्न पाइनेछ । लिलामी सेयरको न्यूनतम मूल्य प्रतिकित्ता १०० रुपैयाँ तोकिएको छ । जसमा कम्तीमा ५० कित्तादेखि बढीमा सबै कित्ताका लागि आवेदन दिन पाइनेछ । अहिले दोस्रो बजारमा शिखरको सेयर प्रतिकित्ता १ हजार २१४ रुपैयाँ हाराहारी छ ।
इन्स्योरेन्सको सेयर बिक्री प्रबन्धक एनआइबीएल एस क्यापिटल लिमिटेड रहेको छ। लगानीकर्ताले एनआइबीएल एस क्यापिटलका सम्पूर्ण शाखा कार्यालय, नेपाल इन्भेष्टमेन्ट बैंकका नारायणगढ, हेटौंडा, बिर्तामोड, जनकपुर, तुलसीपुर दाङ, सुर्खेत, नेपालगञ्ज र धनगढी शाखा कार्यालयका साथै ग्रीन डेभलपमेन्ट बैंक बागलुङबाट आवेदन दिन सक्नेछन्।
