काठमाडौं । दोस्रो बजारमा अजोड इन्स्योरेन्सको सेयर कारोबार शुरु भएको छ ।
गत सोमबार नेप्सेमा सुचीकृत कम्पनीको सेयर चारदिन पछि कारोबारमा आएको हो । यसअघिका दिनमा प्रि ओपनिङ सेसनमा कारोबार हुन नसक्दा कम्पनीको सेयर कारोबारमा आउनसकेको थिएन ।
आइतबार प्रि ओपनिङ सेसनमा कम्पनीको १३० कित्ता सेयर २९१ रुपैयाँमा खरिदबिक्री भएको हो।कारोबारमा आएकै दिन कम्पनीको सेयर मूल्यमा पोजेटिभ सर्किट लागेको छ । २९१ रुपैयाँमा कारोबारमा आएको कम्पनीको सेयर मूल्य १० प्रतिशत अर्थात २९ रुपैयाँले बढेर ३२० रुपैयाँमा कारोबार भइरहेको छ ।
कारोबारमा आएसँगै कम्पनीको सेयर किन्न लगानीकर्ताको ओइरो लागेको छ । १२ बजेसम्म कम्पनीको ४ लाख १५ हजारभन्दा बढी कित्ता सेयर खरिदका लागि माग भएको छ भने विक्रीमा १ कित्ता पनि सेयर छैन । यस अवधिसम्म जम्मा ३०० कित्ता सेयर कारोबार भएको छ ।
अजोडले असार २५ गतेदेखि २९ गतेसम्म १०० रुपैयाँ अंकित मूल्यमा ३० करोड रुपैयाँ बराबरको ३० लाख कित्ता सेयर निष्काशन गरेको थियो । जसमा २ लाख ७३ हजार जनाले १० कित्ताका दरले सेयर पाएका थिए ।
हाल कम्पनीको चुक्ता पूँजी १ अर्ब रुपैयाँ रहेको छ । २ वर्ष अघिदेखि सञ्चालनमा आएको कम्पनीले गत आवमा नयाँ जीवन बीमा कम्पनीहरु मध्ये सबैभन्दा धेरै बीमा शुल्क आर्जन गरेको थियो ।
आर्थिक वर्ष २०७५/७६ मा ४१ करोड बीमा शुल्क आर्जन गरेको कम्पनीले गत आव २०७६/७७ मा त्यसलाई दोब्बरले बढाएर ८६ करोड पुर्याएको छ ।
