काठमाडौं । केही दिनयता देशभर परेको अविरल वर्षाका कारण आएको बाढी, पहिरोले विभिन्न स्थानमा ठूलो क्षति पुर्याएको छ ।
कृषि तथा पशुपंक्षी विकास मन्त्रालयका अनुसार हालसम्म ५ वटा प्रदेशबाट क्षतिको प्रारम्भिक जानकारी आएको छ ।
लगातार परेका पानीका कारण हालसम्म ८८ हजार ६७७ हेक्टर खेतीयोग्य जमिन डुबान परेको छ भने बाढी पहिरोमा परी १ हजार ८१ पशुपंक्षी मरेका छन् ।
यसरी मर्नेका कुखुराको संख्या ८५० रहेको मन्त्रालयका प्रवक्ता हरिबहादुर केसीले जानकारी दिए । उनले तराईका क्षेत्रमा धेरै डुबान भएको देखिए पनि त्यसले धान बालीमा धेरै असर नगरेको बताए । डुबानको केही दिनमै पानी सुकेकाले फेरि बाली ब्युँझने भएकाले धानमा धेरै क्षति नपुगेको उनको भनाइ छ ।
‘धान बालीमै धेरै असर परेको भने छैन, प्रारम्भिक तथ्यांक अनुसार ७ सय हेक्टरमा पहिरोको कारण बालीमा क्षति हुन सक्ने देखाएको छ,’ केसीले चाणक्य पोष्टसँग भने ।
कुन प्रदेशमा कति क्षति
हालसम्म ५ वटा प्रदेशबाट प्रारम्भिक क्षति जानकारी आएको छ । २ वटा प्रदेशको जानकारी आउन बाँकी रहेको छ । प्रदेश २, गण्डकी प्रदेश, प्रदेश ५, कर्णाली प्रदेश र सुदूरपश्चिम प्रदेशबाट प्रारम्भिक क्षतिको जानकारी मन्त्रालयमा आएको हो ।
प्रदेश २ मा ८७ हजार ६२९ हेक्टर जमिन डुबान भएको थियो । सो डुबानले मानिसको दैनिकी कष्टकर बनाए पनि कृषिबालीमा भने धेरै असर नपारेको केसीको भनाइ छ । तर, धेरै दिनसम्म बालीमा डुबान भए त्यसमा क्षति पुर्याउन सक्ने उनले बताए ।
गण्डकी प्रदेशमा १ हजार ८२ हेक्टर क्षेत्रफलमा बाढी तथा पहिरोकाले बालिमा क्षति पुर्याएको छ । सो क्षेत्रमा ३९२ पशुपन्छीमा क्षति परेको हो । सो मध्ये ३०० कुखुरा मरेको र अन्य पशुहरु बाढी तथा पहिरोले बगाएको उनले बताए ।
प्रदेश ५ मा १५६ हेक्टर क्षेत्रमा क्षति पुगेको छ । सो क्षेत्रमा पहिरोका कारण धान, मकैका बालीहरुमा क्षति पुगेको उनले बताए । ३८९ पशुपन्छीमा क्षति पुगेको छ । २५० कुखुराहरु एकै ठाउँमा मरेको उनले जानकारी दिए ।
कर्णाली प्रदेशमा २०५ रोपनी क्षेत्रमा धान खेतमा क्षति भएको छ । सुदूपश्चिम प्रदेशमा ३०० ब्रोइलर कुखुरा बाढीले बगाएको छ ।
