काठमाडौं । एनआइसी एशिया लघुवित्त कम्पनीको सेयरमा लगानीकर्ता झुम्मिएका छन् ।यो साता दैनिक पोजेटिभ सर्किट लाग्दै आएको कम्पनीको सेयर मूल्यमा आज पनि बजार खुलेको केही बेरमै सर्किट लागेको छ ।
करिब ४ लाखभन्दा बढीले आइपीओ भरेको कम्पनीको दोस्रो बजारमा पनि सेयर किन्नेको ओइरो लागेको छ । कम्पनीको ठूलो संख्यामा सेयरको माग भए पनि विक्रीकर्ता भने देखिएका छैनन् ।
बजार खुलेको आधा घण्टामै लघुवित्तको साढे २ लाख कित्ताभन्दा बढी सेयर माग भएको छ । तर आगामी दिनमा अझै भाउ बढ्ने अनुमान गरिएकाले कम्पनीको सेयर बेच्ने कोही पनि छैनन् ।
मंगलबार ४८४ रुपैयाँमा कारोबार भएको कम्पनीको सेयर मूल्य आज बजार खुल्नसाथ करिब १० प्रतिशतले बढेर ५३२ रुपैयाँ पुगेको छ ।
हाल १ अर्ब ४५ लाख १० हजार रुपैयाँ रहेको लघुवित्तको चुक्ता पूँजी आइपीओ निष्काशनपछि १ अर्ब ४८ करोड रुपैयाँ पुगेको छ ।
कम्पनीमा संस्थापकको हिस्सा ६७.८७ प्रतिशत अर्थात १ अर्ब ४५ लाख रुपैयाँ छ भने आइपीओ पश्चात सर्वसाधरणको हिस्सा ३२.१३ प्रतिशत अर्थात ४७ करोड ५५ लाख बराबरको सेयर कायम हुनेछ ।
चालू आर्थिक वर्षको तेस्रो त्रैमाससम्ममा कम्पनीले १२ करोड २७ लाख ८४ हजार रुपैयाँ खुद नाफा आर्जन गरेको । यस अवधिमा कम्पनीको जगेडा कोषको आकार २२ करोड ७५ लाख ९ लाख रुपैयाँ छ ।
कम्पनीको प्रतिसेयर नेटवर्थ १२२.६४ रुपैयाँ, प्रतिसेयर आम्दानी १९.६१ रुपैयाँ, खराब कर्जा अनुपात ०.३२ प्रतिशत, लगानीमा प्रतिफल १८.०३ प्रतिशत रहेको छ।
