काठमाडौं । लकडाउन यता बन्द रहेको सेयर बजार भोली (सोमबार)देखि खुल्ने भएको छ ।
आइतबार बसेको नेपाल धितोपत्र बोर्ड संचालक समितिको बैठकले सोमबारदेखि सेयर कारोबार गर्न नेपाल स्टक एक्सचेन्ज (नेप्से)लाई निर्देशन दिएको छ ।यससँगै भोलिदेखि बजार खुल्ने निश्चित भएको हो ।
लामो समयदेखि बन्द रहेको बजार खोल्न नेप्सेलाई निर्देशन दिइएको बोर्डका अध्यक्ष भिष्मराज ढुंगानाले जानकारी दिए । उनका अनुसार अब कुन मोडलमा कसरी बजार खोल्ने भन्ने निर्णय चाहिँ नेप्सेले गर्ने छ ।
आजै बस्ने नेप्से सञ्चालक समितिको बैठकले सेयर कारोबारको मोडालिटी तयार गर्ने बताइएको छ ।
चैत १० गतेदेखि बन्द रहेको बजार बीचमा बैशाख ३० र ३१ गते २ दिन खुलेको थियो । दुवै दिन नेप्से सूचक नेगेटिभ सर्किट लागेपछि बजार पुनः बन्द गरिएको थियो ।
त्यसबेला नेप्सेले कारोबार अवधि घटाएर २ घण्टामा झारेको थियो भने कारोबार अवधिभर २ प्रतिशतले घटबढ भएमा बजार बन्द हुने व्यवस्था गरेको थियो ।
धितोपत्र बजार सञ्चालक नेपाल स्टक एक्सचेञ्ज यसअघि नै बजार खोल्नुपर्ने पक्ष रहे पनि नियामक निकाय बोर्डले निर्देशन नदिँदा सेयर कारोबार हुन् सकेको थिएन ।
यस्तै, शुक्रबार सेयर लगानीकर्ताका ६ वटा संगठनले सेयर बजार यथाशीघ्र खोल्न बोर्डलाई अनुरोध गरेका थिए । यसअघि बजार सुधारका आवश्यक काम नगरी तत्कालै बजार खोल्न नहुने भन्ने माग राख्दै आएका लगानीकर्ता शुक्रबार आफैं बजार खोल्न माग गर्दै बोर्डमा पुगेका थिए ।
साथै लगानीकर्ताहरुले अब उप्रान्त कुनै पनि वहानामा सेयर बजार बन्द गर्न नहुने भन्दै कहिल्यै आन्दोलन नगर्ने प्रतिबद्धता समेत जनाएका थिए ।
