काठमाडौं । आज (आइतबार)देखि देशभरका सबै मालपोत कार्यालय खुल्ने भएका छन् ।
भूमिसुधार तथा व्यवस्थापन विभागले लकडाउन शुरु भएदेखि बन्द रहेका सबै मालपोत कार्यालय आइतबारदेखि पुनःसञ्चालनमा ल्याउन मातहतका सबै कार्यालयलाई निर्देशन दिएको हो ।
लकडाउनका कारण अढाई महिनादेखि देशभरका भूमिसुधार तथा मालपोत कार्यालयबाट प्रदान गरिने सेवा अवरुद्ध भएको थियो ।
मालपोत कार्यालय खुलेपनि जग्गा पासलगायतका कारोबार भने नहुने विभागले जनाएको छ । कार्यालयका अभिलेखहरु व्यवस्थित गर्ने, लकडाउन अगाडि अधुरा रहेका आन्तरिक कामहरु मिलाउने र आगामी वर्षमा जग्गाको न्यूनतम मुल्यांकनका दररेटहरु परिवर्तन, अड्डा अदालत तथा सरकारी निकायसँग सम्बन्धित लगायत काम हुने जनाइएको छ ।
