काठमाडौं । चालू आर्थिक वर्षको ८ महिनामा नेपाल सरकार (संघीय सरकार) को तिर्न बाँकी खुद सार्वजनिक ऋण ९२ अर्ब रुपैयाँले बढेको छ।
अर्थ मन्त्रालयले सार्वजनिक आर्थिक सर्वेक्षण २०७६/७७ अनुसार चालू आवको फागुनसम्ममा सरकारको ऋण ९१ अर्ब ९० करोड थपिएको छ ।
सर्वेक्षण अनुसार चालू आवको फागुनसम्ममा संघीय सरकारको सार्वजनिक ऋण ११ खर्ब ३९ अर्ब ८० करोड रुपैयाँ पुगेको छ। यो कुल गार्हस्थ उत्पादनको ३०.३ प्रतिशत बराबर हो ।
यो गत आवको असार मसान्तको तुलनामा ८.७६ प्रतिशतले बढी हो । आर्थिक वर्ष २०७५/७६ को अन्त्यसम्म सरकारको सार्वजनिक ऋण १० खर्ब ४७ अर्ब ९० करोड रुपैयाँ थियो ।
सरकारको कुल ऋणमध्ये ६ खर्ब ९९अर्ब ७५ करोड रुपैयाँ बाह्य (विदेशी) ऋण र ४ खर्ब ४० अर्ब ५ करोड रुपैयाँ आन्तरिक ऋण रहेको अर्थ मन्त्रालयले जनाएको छ।
यस अनुसार प्रत्येक नेपालीको थाप्लोमा ३८ हजारभन्दा बढी सार्वजनिक ऋण रहेको छ । हाल नेपालको जनसंख्या २ करोड ९८ लाख ८५ हजार ३९६ छ । सबैलाई समानुपातिक रुपमा भाग लगाउँदा प्रत्येक नेपालीको टाउकोमा ऋणको भारी ३८ हजार १३९रुपैयाँ सार्वजनिक ऋण पर्न आउँछ ।
चालू आवको माघसम्ममा संघीय सरकारको सार्वजनिक ऋण ११ खर्ब १४ अर्ब ८१ करोड रुपैयाँ थियो । पछिल्लो १ महिनामा मात्रै सरकारको ऋण २४ अर्ब ९९करोडले बढेको छ । जसअनुसार एक महिनामै प्रति नेपालीको थाप्लोमा ८३६ रुपैयाँले बढेको छ ।
पछिल्लो समय कोरोना भाइरसका कारण देशको अर्थतन्त्र नै ठप्प जस्तै भएको छ । जसले गर्दा सरकारको आम्दानीको मुख्य स्रोत राजस्व असुलीमा ठूलो गिरावट आएको छ । राजस्व असुलीमा आएको कमीले गर्दा आगामी दिनमा सरकारको ऋण झनै बढ्ने सम्भावना रहेको छ ।
