काठमाडौं । धितोपत्र बोर्डले बिहीबार अर्को व्यवस्था नभएसम्मका लागि नेपाल स्टक एक्सचेन्ज (नेप्से)लाई सेयर कारोबार बन्द गर्न निर्देशन दिएको छ । बोर्डको निर्देशनसँगै सेयर बजार फेरि बन्द हुने भएको हो ।
कोरोना संक्रमण बढ्दो जोखिमलाई मध्येनजर गर्दै बजार बन्द गर्न निर्देशन दिइएको बोर्डले बताएको छ।
डेढ महिनापछि दुईदिन खुलेको सेयर बजार दुवैदिन नेगेटिभ सर्किट लाग्दै कारोबार बन्द भएको थियो । लकडाउन सुरु भएदेखि बन्द सेयर बजार खुलेको पहिलो दिन १ घण्टा २३ मिनेटमै बन्द भएको थियो ।
त्यसदिन बजारमा ८७ कम्पनीका १ लाख ६ हजार कित्ता सेयर किनबेच हुँदैै १० करोड ४३ लाख रुपैयाँको कारोबार भएको थियो ।
दोस्रोदिन बुधबार ४० मिनेटमै कारोबार बन्द भएको थियो । उक्त दिन ७४ कम्पनीको ३६ लाख १३ हजार ५२३ रुपैयाँ बराबरको सेयर कारोबार भएको थियो ।
