काठमाडौं । निजगढ अन्तर्राष्ट्रिय विमानस्थल निर्माणको काम अगाडि बढाइने भएको छ ।
आइतबार पर्यटनमन्त्रामा बसेको आयोजना निर्माणका लागि अन्तर निकाय समन्वय, सहजीकरण एवं आइपरेका समस्या समाधान गर्न गठित उच्चस्तरीय सहजीकरण समितिको ५ औं बैठकले नागरिक उड्डयन प्राधिकरण अन्तर्गत राष्ट्रिय गौरवको आयोजना कार्यहरु यथाशिघ्र अगाडि बढाइ सोको प्रगति प्रतिवेदन १० दिन भित्र समितिमा पेश गर्न निर्देशन दिएको छ ।
संस्कृति, पर्यटन तथा नागरिक उड्डयन मन्त्री योगेश भट्टराईको अध्यक्षतामा बसेको सो बैठकले निजगढ विमानस्थल बनाउनका लागि ४ हजार २३२ वटा रुखहरुको कटान-स्वीकृतीका लागि वन तथा वातावरण मन्त्रालयले चाँडै मन्त्रिपरिषद् समक्ष प्रस्ताव पेश गर्ने भएको छ ।
साथै, विमानस्थल निर्माण क्षेत्रभित्रका रुख तथा पोलहरुको लगत नम्वरीङ कार्य तत्काल अघि बढाउने निर्णय गरेको छ ।
यस्तै बैठकले लगानी बोर्डले निश्चित समय सीमा तोकी जुरिच इन्टरनेशनलसँग सार्वजनिक-निजी साझेदारी (पीपीपी) मोडेलको प्रस्ताव माग गर्ने र सम्झौता प्रकृया पूरा गर्ने समेत निर्णय गरेको छ ।
नेपाल नागरिक उड्डयन प्राधिकरणले निजगढ अन्तर्राष्ट्रिय विमानस्थलको मास्टर प्लान निर्माणको खरिद सम्झौता प्रकृया शीघ्र सम्पन्न गर्ने भएको छ ।
