काठमाडौं । संघ र प्रदेश सरकारको कोरोना भाइरस सङ्क्रमण रोकथाम, नियन्त्रण तथा उपचार कोषमा सिभिल बैंकले ८७ लाख रुपैयाँ सहयोग गरेको छ ।
कोरोना सङ्क्रमणको रोकथाम, नियन्त्रण र प्रभावितका लागि सरकारद्वारा गरिएको प्रयासलाई साथ दिन बैंक आफैँले ७० लाख र बैंकका कर्मचारी तथा सञ्चालकबाट १७ लाख गरी ८७ लाख रुपैयाँ सहयोग गरेको बैंकले जनाएको छ ।
संस्थागत सामाजिक उत्तरदायित्व कोषबाट ७० लाख रुपैयाँ र बाँकी बैंकको सञ्चालक समितिको बैठकको भत्ता र कर्मचारीले आफ्नो तलबबाट कटौती गरेर रकम प्रदान गरेको जनाइएको छ ।
सहयोग प्रदान गरिएको रकम मध्येबाट ४३ लाख ५० नेपाल सरकारद्वारा खडा गरिएको कोरोना भाइरस सङ्क्रमण रोकथाम, नियन्त्रण तथा उपचार कोषको खातामा पठाइएको र सातै प्रदेश सरकारलाई प्रतिप्रदेश ५ लाखका दरले ३५ लाख प्रदान गरिएको बैंकले जनाएको छ ।
यस्तै ८ लाख ५० हजार रुपैयाँ भने बैंकको प्रदेश प्रमुखमार्फत आवश्यक परेको विभिन्न स्थानीय तहमा सोझै सहयोग प्रदान गरिएको जनाइएको छ ।
