काठमाडौं । अन्तर्राष्ट्रिय मुद्रा कोष (आईएमएफ) ले एशियाको आर्थिक वृद्धिदर यस वर्ष शून्यमा आउने प्रक्षेपण गरेको छ ।
अहिले विश्वभर फैलिएको कोरोना भाइरस (कोभिड–१९) महामारीको कारण एशियाको आर्थिक वृद्धिदर ६० वर्षयता पहिलोपटक शून्यमा आउने प्रक्षेपण गरिएको हो ।
आईएमएफका एशिया प्यासिफिक डिपार्टका निर्देशक चाङयोङ रिहीले यो विश्व अर्थतन्त्रको लागि निकै अन्योलपूर्ण र चुनौतीपूर्ण समय रहेको बताएका छन् ।
यो अवस्थामा मुलुकको अर्थतन्त्रमा सुधारको लागि परिवार र कम्पनीहरुलाई सम्बन्धित मुलुकले सहयोग गर्नुपर्ने उनको भनाइ छ । साथै यो संकटको सामनाको लागि प्रभावकारी र समन्वयकारी नीतिको आवश्यकता रहेको उनले बताए ।
सन् २००८को वित्तीय संकटयता यता एशियाको आर्थिक वृद्धिदर औसतमा चार दशमलव ७ प्रतिशत रहँदै आएको छ । प्रभावकारी कदम चाल्न सकेको खण्डमा भने सन् २०२१ मा एशियाको अर्थतन्त्रमा सुधार हुन सक्ने आईएमएफले बताएको छ ।
केही दिनअघि मात्र विश्व बैंकले दक्षिण एशियाको आर्थिक वृद्धिदर ४० वर्षयताकै कमजोर बन्न सक्ने चेतावनी दिएको थियो ।
-बीबीसी
