काठमाडौं । संस्कृति, पर्यटन तथा नागरिक उड्डयन मन्त्री योगेश भट्टराईले त्रिभुवन अन्तर्राष्ट्रिय विमानस्थलसहित देशभरका आन्तरिक विमानस्थलको सरसफाईमा तीव्र सुधार गरिने बताएका छन् । उनले सफाइ मजदूरहरुलाई आवश्यक तालीम र आधुनिक सामग्रीको प्रबन्ध गरेर सरसफाइमा परिवर्तन ल्याइने बताएका हुन् ।
शुक्रबार मन्त्रालयमा आयोजित गैर आवासीय नेपाली संघ (एनआरएनए)ले तयार पारेको देशभरका ११ विमानस्थलको सरसफाइ अवस्थाको ‘अडिट’ मन्त्रालयलाई हस्तान्तरण गरेको छ । सो क्रममा बोल्दै मन्त्री भट्टराईले अन्तर्राष्ट्रिय मापदण्ड अनुसार विमानस्थलहरुको सफाइ लागि सरकारले काम गर्ने बताएका हुन् ।
कार्यक्रममा गैर आवासीय नेपाली संघ (एनआरएनए)का अभियन्ता एंव सफाई विज्ञ खेमनाथ शर्माले ११ विमानस्थलहरुको सरसफाइ अवस्थाको बेग्ला–बेग्लै ‘अडिट’बुझाएका थिए ।
धनगढी, नेपालगञ्ज, गौतमबुद्ध अन्तराष्ट्रिय विमानस्थल भैरहवा, पोखर, भरतपुर, सिमरा, जनकपुर, विराटनगर, चन्द्रगढी, त्रिभुवन अन्तर्राष्ट्रिय विमानस्थल (आन्तरिक) र त्रिभुवन अन्तर्राष्ट्रिय विमानस्थलको स्थलगत अध्ययनपछि ‘अडिट’ रिपोर्ट तयार पारिएको हो ।
‘अडिट’मा हाल विमानस्थलहरुका सरसफाइको अवस्था, समस्या, कानूनी समस्या र आगमी दिनमा गर्नुपर्ने कामहरुको सूची र सुझाव समावेश छ । शर्माले अन्तर्राष्ट्रिय मापदण्ड अनुसार सरसफाई गर्नुपर्ने सफाइका स्पष्ट कानूनी व्यवस्था गर्नु पर्ने, सरसफाई मजदूरलाई तालीमको व्यवस्था गर्नुपर्ने, सफाइ मजदूरले प्रयोग गर्ने सामग्रीमा सुधार गर्नुपर्ने लगायतका सुझाव दिएका थिए ।
मन्त्री भट्टराईले यी सुझावहरु महत्वपूर्ण भएको भन्दै ती सुझावका आधारमा विमानस्थलहरुको सरसफाई सुरु गराउन नेपाल नागरिक उड्डयन प्राधिकरणलाई निर्देशन समेत दिएका थिए । उनले सबै सुझावहरु सम्बन्धित विमानस्थलहरुमा पठाइदिन मन्त्रालयका सहसचिव सुरेश आचार्यलाई निर्देशन दिएका छन् । सुझावहरु तत्काल कार्यान्वयन गराउन र एक महिनापछि कार्यान्वयन अवस्था बारेमा रिपोर्ट तयार पार्नका लागि निर्देशन दिइएको छ ।
सो पछि त्यसको अर्को ३ महिनामा फेरि विमानस्थलहरु निरीक्षण गरी त्यसको सरसफाइको मूल्यांकन गरिने छ । सो मूल्यांकन अनुसार विमानस्थलको सरसफाइलाई विकास गर्दै लैजाने मन्त्रालयको योजना रहेको छ ।
