काठमाडौं । वाणिज्य, आपूर्ति तथा उपभोक्ता संरक्षण विभागले बजार अनुगमन तीव्र बनाएको छ । पछिल्लो समय त्रासको रुपमा फैलिएको कोरोना भाइरसको कारणले व्यापारीले सामन लुकाउने तथा बढी मूल्यमा बेच्ने गरे पश्चात अनुगमनलाई प्राथमिकता दिएको हो ।
त्यस्तै ग्यास तथा पेट्रोलियम पदार्थमा समेत कालो बजारी गरेको पाइए पछि विभागले बजार उजुरीको आधारमा नियमित अनुगमन गरिरहेको छ ।विभागका अनुसार बजारमा यसको माग बढे सँगै व्यापारीहरुले लुकाउनुका साथै महँगो मूल्यमा बेच्न थालेको उजुरी पछि अनुगमन गर्न थालिएको हो । विभागले किराना पसल, मेडिकल, ग्यास स्टोर तथा पेट्रोल पम्प लगायत क्षेत्रमा अनुगमन गरिरहेको छ ।
वाणिज्य, आपूर्ति तथा उपभोक्ता संरक्षण विभागका बजार अनुगमनका निर्देशक सागर मिश्रले दैनिक ४ देखि ५ टोलीले अनुगमन गरिरहेको बताए । उनले प्रहरीको सहयोगमा सामानहरु जफत भइरहेको बताए ।
‘हामिले दिनदिनै अनुगमन गरिराखेका छौँ । दिनमा ४/ ५ टोलिद्धारा अनुगमन भइराखेको छ । यसलाई अझै विशेष प्रथामिकताका साथ अगाडि बढाउने छौँ’, अनुगमन निर्देशक मिश्रले भने । ठगी गरेको पाइएमा २ लाखदेखि ३ लाखसम्म जरिवाना गर्ने गरेको उनले बताए ।
विभागले चैत्र महिनासुरु भएपछि मात्रै अनुगमन टोलिद्धारा १० ओटा पेट्रोल पम्पमा अनुगन गरेको छ । त्यस मध्य ८ पेट्रोल पम्प सामान्य अवस्थामा थिए भने एक पेट्रोल पम्पलाई कृत्रिम अभाव सृजना गरेको आधारमा २ लाख जरिवाना गराएको छ । बाँकी एक लाई तत्काल सुधार गर्न विभागले निर्देशन दिएको छ ।
विभागले चैत्र ४ गतेसम्ममा विभिन्न ग्यास तथा खाद्य स्टोरमा पनि अनुगमन गरी कारबाही गरेको छ । बजारमा ग्यास तथा नुनको कृत्रिम अभाव देखिएसँगै अनुगमनले तीव्र्र रुप लिगेको छ । विभागले ४ दिनमा ग्यास स्टोर र किराना खाद्य स्टोर गरी २९ ओटा स्थानमा अनुगमन गरेको थियो ।
त्यस मध्य १६ ओटा सामान्य अवस्था थिए भने ७ ओटालाई तत्काल सुधार गर्न निर्देशन दिएको थियो । खान अयाग्य तथा म्याद सकिएको ४१ हजार ६ सय खान अयोग्य खाद्य वस्तु नष्ट गरीएको छ । त्यसै गरी खरिद बिल तथा ग्यास मौज्दात नभएको भनेर ३ स्टोरहरुलाई ५/५ हजार जरिवाना तिराइएको छ । त्यसैगरी ग्यासमा कृत्रिम अभाव सृजना गराएको कारणले एक ग्यास स्टोरलाई २ लाख जरिवाना गराएको छ ।
