काठमाडौ । विश्वभर त्रासका रुपमा फैलिएको कोरोना भाइरसको कारणले गर्दा अहिले काठमाडौको मुख्य बजारको रुपमा रहेको असन, न्यूरोड, महाबौद्ध लगायतका ठाँउहरु सुनसान देखिन थालेका छन् । पहिला व्यस्त देखिने सडकहरु सुनसान हुन थालेका हुन् । सिनेमा हल, सपिङ महल, होलसेल पसलहरु लगभग शून्य नै देखिन्छ ।
बजारमा विस्तारै सामानहरुको अभाव देखिन थालेका छन् भने भएका सामानहरु किन्न आउने मान्छे पनि छैनन् । चीनबाट भित्रिने लत्ताकपडा तथा अन्य वस्तुहरु नेपाल भित्रिन पाएका छैनन् । त्यसको प्रभाव नेपाली बजारमा सजिलै देख्न सकिन्छ । अहिले बजारमा फेन्सी सामानहरुको अभाव देखिन थालेको छ ।
बजारमा नयाँ समानहरु भित्रिएको त छैन नै, स्टकमा भएका सामानहरु समेत बिक्न छाडिसकेको व्यवसायीहरु बताउँछन् । ‘बजारमा चहलपहल नै छैन, ग्राहकहरु आउँदैनन् । हाई काढेर बस्ने बाहेक केहि काम छैन’, इनर्जी सप्लार्यस, महाबौद्धका ध्रुव सुवेदीले चाण्क्य पोष्ट सँग भने । यसरी ग्राहकहरु आउन छाडे भने यही सामानले अझै ६ महिना पुग्ने उनले बताए ।
‘पसलमा सामान हुँदा हुँदै पनि किन्ने ग्राहकहरु नआउँदा दिनभरि मोबाइल चालाएर बस्ने गरेको छु’, न्यूरोडको शान्ता ट्रेर्डसकी अस्मिता लामा बताउँछिन् । विगतको तुलनामा व्यापारमा ८० प्रतिशत कमी आएको उनले बताइन ।
‘पसलमा व्यापारको अवस्था शून्य छ । कतिपय सामानहरु सकिएका छन् भने कति स्टक सामानहरु पसलमा छन् अहिले । घाटाको व्यापार भइरहेको छ’, हरिसिद्धि स्टोर महाबौद्धका, कुश श्रेष्ठले भने । यस्तै हो भने सटर भाडा र गोदाम भाडा समेत तिर्न नसकिने उनले बताए ।
बजारमा हिँड्ने मान्छेहरुको संख्यामा कमी आए सँगै व्यापार ठप्प भएको उनले बताए । ‘बजारमा गर्मीका लागि चाहिने कपडाहरु पर्याप्त मात्रामा छैनन् । किन्ने मान्छे पनि छैनन् । कुरो मिलेकै छ’, उनले भने ।
चीनबाट फैलिएको कोरोनाले विश्व बजारमा नै असर पारेको छ । सरकारले धेरै भिडभाडमा नहिँड्न र विशेष काम नपरी घरबाट ननिस्किन अनुराध गरे पश्चात बजार झन सुनसान भएको व्यापारीहरुको बुझाइ छ ।
