काठमाडौं । विद्युत प्राधिकरणले विद्युतीय तार भूमिगत गर्ने काम आज सोमबारबाट सुरु गरेको छ । पहिलो चरणमा रत्नपार्क र महाराजगञ्जका वितरण केन्द्रका विद्युतीय तारहरु भूमिगत गर्न लागिएको हो ।
विजुलीका तार भूमिगतका लागि सबै उपकरण तथा मेसिनहरु आइसकेको र आजबाट औपचारिक रुपमा काम सुरु गरिएको प्राधिकरणका निर्देशक तथा प्रवक्ता प्रवल अधिकारीले जानकारी दिए ।
रत्नपार्क र महाराजगञ्जमा विजुलीका तर भूमिगत गर्न सडक विभागबाट अनुमति नआउँदा काममा ढिलाई भएको अधिकारीले बताए ।
आज प्रधानमन्त्री केपी शर्माओलीले विद्युतीय तार भूमिगत गर्ने कामको औपचारिक सुरुवात गरेका हुन् । प्राधिकरणले ‘होराइजनल ड्रिलिङ’ प्रविधिबाट ठाउँ–ठाउँमा प्वाल पारेर तार भूुमिगत गर्ने छ । यसरी काम गर्दा सबै स्थानमा सडक खन्नुपर्दैन ।
रत्नपार्क र महाराजगञ्जका केन्द्र आसपासको ठाउँमा तार भूमिगत गर्ने काम भारतको केइआइकके कम्पनीलाई ठेक्का दिइएको छ ।
विद्युत वितरण प्रणालीलाई भूमिगत गर्न एसियाली विकास बैंक (एडीबी) ले १५ अर्ब रुपैयाँ ऋण सहयोग गरेको छ । विद्युत वितरण भूमिगत भएपछि अहिले जस्तो सडकमा तार देखिने छैन ।
विजुलीका तार भूमिगतको काम २०७८ मंसिरसम्म सम्पन्न गर्ने लक्ष्य राखिएको प्राधिकरणले जनाएको छ । अन्य केन्द्रमा पनि भूमिगत गर्नका लागि बोलपत्र आह्वान गरि मुल्यांकन भइरहेको जनाइएको छ ।
विद्युत वितरण प्रणालीलाई पहिलो पटक अण्डरग्राउन्ड गर्न लागिएको हो । यो सफल भएपछि अन्य स्थानहरुका वितरण प्रणालीलाई भूमिगत गर्दै लैजाने तयारी विद्युत प्राधिकरणले गरेको छ ।
तस्विरः अनलाइन खबरबाट
