काठमाडौं । शिखर इन्स्योरेन्सले ३० प्रतिशत हकप्रद शेयर बिक्रीका लागि बुक क्लोज मिति तोकेको छ ।
कम्पनीको फागुन १ गते बसेको सञ्चालक समितिको बैठकले हकप्रद प्रयोजनका लागि फागुन १३ गते (मंगलबार) शेयरधनी दर्ता पुस्तिका बन्द गर्ने निर्णय गरेको छ ।जस अनुसार कम्पनीको हकप्रद शेयरमा आवेदन दिन फागुन १२ गतेसम्म शेयरधनी कायम हुनुपर्नेछ ।
इन्स्योरेन्सले प्रति शेयर १०० अंकित मूल्यका ३१ करोड ७१ लाख ९३ हजार २ सय बराबरको ३१ लाख ७१ हजार ९ सय ३२ कित्ता हकप्रद निष्काशन गर्नेछ ।
इन्स्योरेन्सको गत साउन २८ गते सम्पन्न १४ औं वार्षिक साधारण सभाले हकप्रद निष्काशन गर्ने प्रस्ताव पारित गरेको थियो।
इन्स्योरेन्सको हकप्रद निष्काशनको काम एनआईबीएल क्यापिटलले गर्नेछ । कम्पनीको हकप्रदलाई इक्रा नेपालले इक्रा एनपी आईपीओ ग्रेड ३ (प्लस) रेटिङ प्रदान गरेको छ ।
हाल कम्पनीको चुक्ता पूँजी १ अर्ब ५ करोड रहेको छ। हकप्रद बिक्री पछि कम्पनीको चुक्ता पूँजी १ अर्ब ३७ करोड ४५ लाख पुग्नेछ।
