नबिल बैंकको चालु आर्थिक वर्षको दोस्रो त्रैमाससम्म आइपुग्दा खुद नाफा ६.२० प्रतिशतले अर्थात १३ करोड ५० लाख रुपैयाँ घटेको छ । यसअवधिमा बैंकको खुद नाफा २ अर्ब ४ करोड १८ लाख ६१ हजार रुपैयाँमा सीमित भएको छ । गत वर्ष यसैअवधिमा बैंकले २ अर्ब १७ करोड ६८ लाख ६२ हजार रुपैयाँ खुद नाफा कमाएको थियो ।
बैंकको खुद ब्याज आम्दानी र सञ्चालन नाफा दुबै घटेकाले खुद नाफा घटेको हो । समीक्षा अवधिमा बैंकको खुद ब्याज आम्दानी १५ करोड ९६ लाख रुपैयाँ घटेर ३ अर्ब ४५ करोड १६ लाख रुपैयाँमा सीमित भएको छ। बैंकको सञ्चालन मुनाफा समीक्षा अवधिमा १७ करोड ४३ लाख रुपैयाँ घटेर २ अर्ब ९० करोड ९३ लाख रुपैयाँमा सीमित भएको छ।
यता, बैंकको चुक्ता पुँजीको आकार २५.५४ प्रतिशतले बढेको १० अर्ब ९ करोड ७४ लाख रुपैयाँ चुक्ता पूँजी रहेको छ । नाफा घट्नु र पुँजीको आकार बढ्नुको असर बैंकको प्रतिसेयर आम्दानीमा परेको छ । बैंकको प्रतिसेयर आम्दानी समीक्षा अवधिमा भन्दा ८ रुपैयाँ ९६ पैसाले घटेर ४५ रुपैयाँ ३२ पैसामा सीमित भएको छ ।
१ खर्ब ६४ अर्ब ३२ करोड रुपैयाँ निक्षेप सङ्कलन गरी १ खर्ब ४१ अर्ब ३९ करोड कर्जा परिचालन गरेको यस बैंकले पुस मसान्तसम्ममा ८ अर्ब १४ करोड रुपैयाँ ब्याज आम्दानी गरी ४ अर्ब ६८ करोड रुपैयाँ ब्याज खर्च गरेको छ। बैंकको निष्क्रिय कर्जा सो अवधिसम्ममा ०.६२ प्रतिशतबाट बढेर ०.७५ प्रतिशत पुगेको छ।
यस बैंकको जगेडा कोषमा ११ अर्ब ६७ करोड ६ लाख रुपैयाँ सञ्चित छ। त्यसैगरी, बैंकको शेयरधनी कोषमा २ अर्ब १३ करोड ४ लाख रुपैयाँ र शेयर प्रिमियममा ७४ हजार रुपैयाँ रहेको छ।
पुस मसान्तसम्ममा बैंकको वितरण योग्य मुनाफा १ अर्ब ४५ करोड ९१ लाख रुपैयाँ रहेको छ। सो अवधिसम्ममा बैंकको कोषको लागत ६.०२ प्रतिशत, आधार दर ८.१० प्रतिशत र स्प्रेड दर ४.९९ प्रतिशत कायम रहेको छ।
