काठमाडौं । काठमाडौं महानगरपालिकाले सडकका अव्यवस्थित बिजुली, केवल र टेलिफोनका तारहरु व्यवस्थापन गरिरहेको छ । अहिले ठाउँ ठाउँ तार बेरेर राख्ने काम भइरहेको छ भने नेपाल विद्युत प्राधिकरणले आफ्ना सबै तार अन्डरग्राउण्ड गर्न पाइपलाइन निर्माण गर्ने योजना तयार गरेको छ ।
प्राधिकरणले ल्याएको अन्डरग्राउण्डको कामलाई धेरै समय लाग्ने भएपछि महानगरले छुट्टै योजना बनाएर तार व्यवस्थापन गर्न लागेको हो । महानगरले वैकल्पिक योजनाको रुपमा पोलका तारमा पाइप राख्ने तयारी गरेको हो ।
अहिले गुजुल्टिएका तारहरुलाई कसरी व्यवस्थित गर्ने भन्ने विषयमा नेपाल विद्युत प्राधिकरण, काठमाडौं माहानगरपालिका र केवुल एसोसियसन बीच छलफल भइरहेको काठमाडौं माहानगरपालिकाका शहरी शुव्यवस्थापन शाखा प्रमुख हरिबहादुर कुँवरले जानकारी दिए ।
‘तार व्यवस्थापनका लागि हामी नयाँ–नयाँ टेक्नोलोजीहरु अपनाउने योजनामा छौ, सरोकारवाला निकायसँगको छलफलपछि यसमा टुङ्गो लाग्नेछ’, प्रमुख कुँवरले चाण्क्य पोष्टसँग भने ।
प्रत्येक पोलमा क्याप राखेर, त्यही डिजाइनको पाइप भित्रबाट तारलाई जडान गर्दै लगिने उनले बताए । अन्डरग्राउण्ड नबनेसम्मका लागि यो बैकल्पिक योजनाका रुपमा मात्र रहने छ । पाइप राखेर तार व्यवस्थापन गर्ने काम एक सय जना कामदार राखेर एक वर्ष भित्र सक्ने योजना भएको उनले जानकारी दिए ।
यसका लागि माहानगरपालिकाले कुनै संस्थासँग सहकार्य गर्ने छ । पाइप राखेर तार व्यवस्थापन तथा निर्माण गर्ने जिम्मा प्राधिकरणलाई दिइने उनले बताए ।
हाल काठमाडौं माहानगरपालिकाले त्रिपुरेश्वरदेखि महाराजगंज, महाराजगंज चक्रपथ हुँदै चावहिल गौशाला, तालिमकेन्द्र हुँदै वालुवाटार, गैरिधारा, पुतलिसडक, जयनेपालहल हुँदै थापाथली, त्रिपुरेश्वरदेखि सोल्टिमोड लगायतका क्षेत्रमा तारहरु व्यवस्थापन गरिरहेको छ ।
यस्तै मुख्य सडकसँगै साना सडकहरुमा पनि तार व्यवस्थापन अन्डरग्राउण्ड गर्नका लागि नेपाल विद्युत प्राधिकरणले काठमाडौं माहानगरपालिकासँग थप सहमति माग्दै छ ।
प्राधिकरणले पहिलो चरणमा भिआइपी सडकहरु एरपोर्टदेखि कलङकी त्रिपुरेश्वरदेखि महाराजगंज, जमल, दरबारमार्ग, वालुवाटार, गैरिधारा, कमलपोखरी, ज्ञानेश्वर, हुँदै एयरपोर्ट गौशाला हुँदै बौद्धसम्म पाइप राखेर तार व्यवस्थापन तथा निर्माण गर्ने योजना बनाएको छ ।
