काठमाडौं । नेपाल धितोपत्र बोर्ड (सेबोन)ले धितोपत्र व्यवसायी (मर्चेन्ट बैंक)को ‘अन्डरराइटिङ’को सीमा बढाएको छ ।धितोपत्र बोर्डले बैंक तथा बीमा कम्पनीका सहायक कम्पनी मार्फत हुने ‘अन्डरराइटिङ’को अधिकतम सीमा बढाएको हो ।
धितोपत्र बोर्ड संचालक समितिको गत शुक्रबार बसेको बैठकले मर्चेन्ट बैंकरको ‘अन्डरराइटिङ’ सीमा बढाउने निर्णय गरेको हो ।
बोर्डका अनुसार अब बैंक र बीमा क्षेत्र माउ कम्पनी रहेका मर्चेन्ट बैंकरहरूले कम्पनीसँग सम्झौता गरेर माउ कम्पनीको नेटवर्थ बराबर रकमको अन्डरराइटिङ गर्ने सक्ने छन् । हाल मर्चेन्ट बैंकर कम्पनीले आफ्नो अन्तिम लेखापरीक्षण भएको नेटवर्थको ३ गुणासम्मको रकम बराबरको धितोपत्र मात्रै अन्डरराइटिङ गर्न पाउने व्यवस्था थियो ।
नयाँ व्यवस्था बैंक र बीमा क्षेत्रका माउ कम्पनी रहेका मर्चेन्टको हकमा मात्र लागू हुनेछ । अन्य मर्चेन्टको हकमा भने हालकै व्यवस्था लागू हुनेछ ।
२०७६ अघि मर्चेन्टले आफ्नो नेटवर्थको ५ गुणासम्म अन्डरराइटिङ गर्न सक्ने व्यवस्था थियो । तत्कालीन बोर्ड अध्यक्ष भिष्मराज ढुंगानाले उक्त सीमा घटाउँदै ३ गुणामा झारेका थिए ।
पछिल्लो समय मर्चेन्ट बैंकरहरू नेटवर्थ सीमाका कारण अन्डरराइटिङ गर्नै नसक्ने अवस्थामा पुगेका थिए ।हाल ८० बढी कम्पनी आइपीओको पाइप लाइनमा छन् । नयाँ अध्यक्ष आएसँगै बोर्डले पछिल्लो समय धमाधम आइपीओ अनुमति दिइरहेको छ । तर, अन्डरराइटिङ क्षमता नहुँदा मर्चेट बैंकर कम्प्नी समस्यामा थिए । त्यसलाई सम्बोधन गर्न बोर्डले सीमा बढाएको हो ।
