काठमाडौं । लक्ष्मी स्टीलले डेडिकेटेड तथा ट्रंक लाइनको बक्यौता रकम तिर्न थालेको छ । नवलपरासी (बर्दघाट सुस्ता पश्चिम)को सुनवलमा संचालित लक्ष्मी स्टीलले बक्यौताको पहिलो किस्ताबापत ८४ लाख ९८ हजार रुपैयाँ तिरेको हो ।
नेपाल विद्युत प्राधिकरण, परासी वितरण केन्द्रका अनुसार लक्ष्मी स्टीलले २३ करोड ७९ लाख रुपैयाँ बक्यौता तिर्न बाँकी छ । सो मध्ये पहिलो किस्तामा ८४ लाख ९८ हजार रुपैयाँ तिरेको हो ।
उद्योगले २८ किस्तामा बक्यौता तिर्ने बताएको छ । डेडिकेटेड तथा ट्रंक लाइन महशुल बक्यौता लामो समयदेखि विवादित बन्दै आएको छ । केही उद्योगले किस्ताम तिर्न थालेका छन् भने ३० बढी उद्योगले अझै तिरेका छैनन् ।
त्यसैगरी, सुनवलमै सञ्चालित अर्को उद्योग सर्वोत्तम सिमेन्टले पनि बक्यौता बापतको दोस्रो किस्ता बुझाएको छ । २८ किस्तामा बक्यौता तिर्ने प्रतिबद्धता जनाएको उद्योगले शुक्रबार दोस्रो किस्ताबापत ३७ लाख ६३ हजार रुपैयाँ बुझाएको प्राधिकरणले जर्नाको छ । सर्वोत्तमले कुल ११ करोड ९६ लाख रुपैयाँ बक्यौता तिर्न बाँकी छ ।
