काठमाडौं । सेयर बजारमा लगातार गिरावट आएको छ । यस साता आइतबारदेखि नै ओरालो लागेको नेप्सेले आज पनि सोही लय कायम राखेका हो ।
मंगलबार नेप्से परिसूचक ७.६६ अंकले घटेर २६९७.०४ बिन्दुमा आइपुगेको छ । सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम १ अर्ब ६ करोड रुपैयाँले घटेर ४ अर्ब ३६ करोड रुपैयाँमा सीमित भएको छ ।
आज कारोबारमा आएका १३ वटा समूह मध्ये अन्य बाहेक अरु सबै समूहको परिसूचक घटेको छ । जीवन बीमा समूहको परिसूचक सर्वाधिक ०.७० प्रतिशतले घटेको छ ।
आज पनि हिमालयन रि इन्स्योरेन्सको सर्वाधिक ३२ करोड ११ लाख रुपैयाँ बढीको सेयर किनबेच भएको छ । त्यस्तै, घलेम्दी हाइड्रोपावरको दोस्रो धेरै २२ करोड ७२ लाख रुपैयाँको कारोबार भएको छ ।
आज कारोबारमा आएका मध्ये ८६ कम्पनीको सेयर मूल्य बढेको छ भने १५२ कम्पनीको मूल्य घटेको छ ।
घट्दो बजारमा आज मिथिला लघुवित्तका सेयरधनीले सर्वाधिक ९.९६ प्रतिशत कमाएका छन् । त्यस्तै, हिमालयन पावरको सेयर मूल्य ९.९० प्रतिशतले बढेको छ ।
आज सामुदायिक लघुवित्तका सेयरधनीले भने सर्वाधिक ८.२१ प्रतिशत गुमाएका छन् ।
