काठमाडौं । सेयर बजारमा लगातार तेस्रो दिन दोहोरो अंकको गिरावट आएको छ । सोमबारदेखि लगातार ओरालो लागेको नेप्सेले आज पनि सोही लय कायम राखेको हो । पछिल्ला ३ दिनमा नेप्से ६९ अंकले घटेको हो ।
बुधबार नेप्से परिसूचक २५.१६ अंकले घटेर २८२१.१३ बिन्दुमा आइपुगेको छ । आज सूचकसँगै कारोबार रकममा पनि गिरावट आएको छ । अघिल्लो दिनको तुलनामा कारोबार रकम १ अर्ब ३२ करोडले घटेर १० अर्ब ९७ करोड रुपैयाँमा सीमित भएको छ ।
आज कारोबारमा आएका १३ वटा समूह मध्ये व्यापार बाहेक अरु सबै समूहको परिसूचकमा गिरावट आएको छ । फाइनान्स समूहको परिसूचक सर्वाधिक १.५७ प्रतिशतले घटेको छ ।
आज पनि पुनर्बीमा कम्पनीहरूको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक ९६ करोड ७० लाख रुपैयाँ बढीको सेयर किनबेच भएको छ । त्यस्तै, नेपाल पुनर्बीमा कम्पनीको दोस्रो धेरै ९० करोड रुपैयाँको कारोबार भएको छ ।
आज कारोबारमा आएका मध्ये ६२ कम्पनीको सेयर मूल्य बढेको छ भने १७४ कम्पनीको मूल्य घटेको छ ।
घट्दो बजारमा पनि आज दुई कम्पनीको सेयर मूल्यमा पोजेटिभ सर्किट लागेको छ । गार्डियन माइक्रो लाइफ इन्स्योरेन्स र समाज लघुवित्तका सेयरधनीले ठ्याक्कै १० प्रतिशत कमाएका छन् ।
आज ग्रीन डेभलपमेन्ट बैंकका सेयरधनीले सर्वाधिक ६.८४ प्रतिशत गुमाएका छन् । त्यस्तै, सप्तकोशी डेभलपमेन्ट बैंक, उपकार लघुवित्त र मनकामना इन्जिनियरिङका सेयरधनीले ४ प्रतिशभन्दा धेरै गुमाएका छन् ।
