काठमाडौं । सेयर बजारमा करेक्सन आएको छ । गत फागुन ४ गतेदेखि लगातार २११ अंकले बढेको नेप्सेमा आज भने दोहोरो अंकको करेक्सन आएको हो ।
सोमबार नेप्से परिसूचक १३.६२ अंकले घटेर २८७६.६६ बिन्दुमा आइपुगेको छ । आज सूचकसँगै गिरावट आए पनि कारोबार रकममा भने झिनो वृद्धि भएको छ । अघिल्लो दिनको तुलनामा कारोबार रकम ३ करोडले बढेर १४ अर्ब २८ करोड रुपैयाँ पुगेको छ ।
आज कारोबारमा आएका १३ वटा समूहमध्ये ५ समूहको परिसूचक बढेको छ भने ८ को घटेको छ । अन्य समूहको परिसूचक सर्वाधिक १.६८ प्रतिशतले बढेको छ भने होटल समूहको १.८८ प्रतिशतले घटेको छ ।
आज पनि पुनर्बीमा कम्पनीहरूको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक १ अर्ब ३८ करोड रुपैयाँ बढीको सेयर किनबेच भएको छ । त्यस्तै, नेपाल पुनर्बीमा कम्पनीको दोस्रो धेरै ७३ करोड रुपैयाँको कारोबार भएको छ ।
आज कारोबारमा आएका मध्ये ५१ कम्पनीको सेयर मूल्य बढेको छ भने १८७ कम्पनीको मूल्य घटेको छ ।
घट्दो बजारमा पनि आज गार्डियन माइक्रो लाइफ इन्स्योरेन्सको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
आज समाज लघुवित्तका सेयरधनीले भने सर्वाधिक १० प्रतिशत गुमाएका छन् ।
