काठमाडौं । नेपाल स्टक एक्स्चेन्ज (नेप्से)को प्रमुख कार्यकारी अधिकृत (सीईओ) पदका लागि दरखास्त दिने समयावधि थप भएको छ ।
खुल्ला प्रतिस्पर्धाबाट सीईओ नियुक्तिका लागि गठित सिफारिस समितिले सीईओका लागि आवेदन दिने समय फागुन २५ गतेसम्म थप गरेको हो ।
यसअघि फागुन १८ गतेसम्म आवेदन दिने मिति तोकिएके थियो । यस बीचमा ३ दिन सार्वजनिक बिदा परेकाले म्याद थप गरिएको समितिले जनाएको छ ।
नेप्सेको सीईओका लागि आवेदन दिन अर्थशास्त्र, वाणिज्यशास्त्र, वित्तशास्त्र, व्यवस्थापन, सूचना प्रविधि वा वाणिज्य वा कानुन विषयमा कम्तीमा स्नातकोत्तर वा चार्टर्ड एकाउण्टेन्सी वा सो सरहको उपाधि हासिल गरेको हुनुपर्ने छ ।
साथै पूँजी बजार वा वित्तीय क्षेत्र वा व्यवस्थापन सम्बन्धी कार्यमा कम्तीमा ७ वर्ष उच्च व्यवस्थापकीय तहमा काम गरेको अनुभवसहित कम्तीमा १५ वर्षको अनुभव हुनुपर्ने छ ।
योग्यता पुगेका इच्छुक उम्मेदवारले फागुन १८ गते भित्र अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखा, सिंहदरबारमा आवेदन बुझाउनुपर्नेछ । आवेदन दस्तुर ७ हजार ५०० रुपैयाँ लाग्ने छ ।
कृष्णबहादुर कार्कीको कार्यकाल सकिएसँगै माघ २५ गतेदेखि नेप्से नेतृत्वविहीन छ ।
