काठमाडौं । पोखरा क्षेत्रीय अन्तर्राष्ट्रिय विमानस्थलको निर्माण कार्य ५४ प्रतिशत सम्पन्न भएको छ । निर्माण शुरु भएको २६ महिनामा ५४ प्रतिशत भौतिक प्रगति भएको हो ।
हालसम्म निर्माणका क्रममा ११ अर्ब रुपैयाँ खर्च भइसकेको छ । कुल २२ अर्ब रुपैयाँ चिनियाँ ऋण सहयोगमा विमानस्थल निर्माण भइरहेको हो ।
पोखरा विमानस्थलको निर्माण तोकिएको समयभन्दा छिटो सकिने अनुमान गरिएको छ । विमानस्थल निर्माणका प्रमुख प्रदिप अधिकारी ले २०२० भित्रै निर्माण सम्पन्न गर्ने गरी काम भइरहेको बताए ।
‘अहिले जुन गतिमा काम भइरहेको छ, त्यस अनुसार अन्तिमसम्म काम हुने हो भने ६ महिना अघिनै विमानस्थलको निर्माण सम्पन्न हुने छ । तोकिएको समयभन्दा छिटो काम सक्ने गरी हामी काम गरिरहेका छौँ,’ अधिकारीले चाणक्य पोष्टसँग भने ।
विमानस्थल निर्माण सन् २०२१ जुलाई १० सम्म सक्ने गरी सम्झौता भएको छ । सो अवधिभन्दा ६ महिना अघि निर्माण काम सम्पन्न गर्ने गरी काम भइरहेको उनले बताए । विमानस्थल निर्माण सन् २०१७ को नोभेम्वर महिनादेखि शुरु भएको हो ।
हालसम्म रन वे, ट्याक्सी पार्किङ, टर्मिनल भवन, एप्रोन (यात्रु जहाजमा चढ्ने र ओर्लने स्थान), नाला निर्माण, ह्याङगर निर्माण लगायतका काम भइसकेको उनले बताए । उनका अनुसार अब फिनिसिङ इक्यस्प्मेन्टहरु बनाउने काम गर्न बाँकी रहेको छ ।
विमानस्थलको टर्मिनल भवन १४ हजार स्क्यार मिटरमा बन्ने छ । ८ हजार स्क्यार मिटर अन्तर्राष्ट्रिय उडानका लागि र ६ हजार स्क्यार मिटर आन्तरिक उडानका लागि गरी १४ हजार स्क्यार मिटरको टर्मिनल भवन निर्माण हुन लागेको हो । वार्षिक ५ लाख क्षमता भएको टर्मिनल भवन निर्माण गरिदै छ ।
पोखरा विमानस्थलको निर्माण पूरा भएपछि बोइङ ७ सय ५७ र एयरबस ३ सय २० वा सो सरहका जहाज आवतजावत गर्न सक्नेछन् । २५ सय मिटर लामो धावनमार्ग हुने विमानस्थलमा आउनेजाने ती विमानको यात्रु क्षमता १ सय ९२ हाराहारीमा रहने छ ।
सो विमानस्थल चिनियाँ ठेकेदार कम्पनी सीएएमसीईले निर्माण गरिरहेको छ । विमानस्थल निर्माणमा ४ सय ५० बढी कामदार खटिएको उनले जानकारी दिए ।
