काठमाडौं । सेयर बजारमा लगातार सातौं दिन वृद्धि भएको छ । फागुन ४ गतेदेखि लगातार उकालो लागेको नेप्सेले आज पनि सोही लय कायम राखेको हो । पछिल्ला ७ दिनमा नेप्से ८७ अंकले बढेको छ ।
मंगलबार नेप्से परिसूचक ७.१३ अंकले बढेर २७६५.८८ बिन्दुमा पुगेको छ । आज सूचक बढे पनि कारोबार रकममा भने गिरावट आएको छ । अघिल्लो दिनको तुलनामा कारोबार रकम १ अर्ब १८ करोड रुपैयाँ घटर ९ अर्ब ९० करोड रुपैयाँमा सीमित भएको छ ।
आज कारोबारमा आएका १३ वटा समूहमध्ये ७ समूहको परिसूचक बढेको छ भने ६ को घटेको छ । अन्य समूहको परिसूचक सबैभन्दा धेरै २.९० प्रतिशतले बढेको छ भने व्यापार समूह २.५१ प्रतिशतले घटेको छ ।
आज पनि पुनर्बीमा कम्पनीहरुको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक १ अर्ब २ करोड रुपैयाँ बढीको सेयर किनबेच भएको छ । त्यस्तै, नेपाल पुनर्बीमाको दोस्रो धेरै ८३ करोड रुपैयाँको कारोबार भएको छ ।
आज कारोबारमा आएका मध्ये १०४ कम्पनीको सेयर मूल्य बढेको छ भने १३२ कम्पनीको मूल्य घटेको छ ।
बढ्दो बजारमा आज गार्डियन माइक्रो लाइफ इन्स्योरेन्स र नेपाल ल्युब आयलको सेयर मूल्यमा पोजेटिभ सर्किट लागेको छ । यी कम्पनीका सेयरधनीले १० प्रतिशत कमाएका छन् ।
आज विन नेपाल लघुवित्तका सेयरधनीले भने सर्वाधिक ८.९७ प्रतिशत गुमाएका छन् ।
