काठमाडौं । नेपाल मेडिकल कलेजले सेयरधनीलाई ३० प्रतिशत नगद लाभांश वितरण गर्ने भएको छ ।
शनिबार सम्पन्न कलेजको २५ औं वार्षिक साधारण सभाले सेयरधनीलाई आर्थिक वर्ष २०८०/८१ को खुद मुनाफाबाट १५ करोड, ७४ लाख, २३ हजार ७४७ रुपैयाँ नगद लाभांश (करसहित) वितरण गर्ने प्रस्ताव पारित हो ।
कलेजका अध्यक्ष प्रा.डा. जैनुद्धिन अन्सारीले चिकित्सा शिक्षा र स्वास्थ्य सेवाको क्षेत्रलाई व्यवसायिक रुपमा मात्र हेर्न नहुने बताए ।
मेडिकल कलेजहरूले प्रदान गर्दै आइरहेको चिकित्सा शिक्षा र स्वास्थ्य सेवाले समाज र राष्ट्रप्रति नै योगदान गरेको बताउँदै उनले राज्यले निजी क्षेत्रबाट मेडिकल शिक्षा र स्वास्थ्य सेवामा पुर्याउँदै आएको योगदानको कदर गर्नुपर्ने बताए ।
सरकारले जनताका लागि ल्याएको निःशुल्क स्वास्थ्य सेवाका अभियानहरू सफल पार्न निजी मेडिकल कलेजहरूले महत्वपूर्ण योगदान दिएको उनको भनाइ छ । प्रा.डा. अन्सारीले कलेजमा गोकर्णेश्वर नगरपालिका स्वास्थ्य कार्यक्रम, सामाजिक सुरक्षा स्वास्थ्य कार्यक्रम, कर्मचारी सञ्चय कोष स्वास्थ्य कार्यक्रम, नेपाल सरकार बीमा कार्यक्रम तथा विपन्न नागरिकको स्वास्थ्य सेवा कार्यक्रम सूचारु रहेको जनाए ।
कलेजको वार्षिक प्रतिवेदन पेश गर्दै उनले आगामी आर्थिक वर्षभित्रै मुटु रोगको उपचारका लागि क्याथ ल्याब, क्यान्सर उपचारका लागि अंकोलोजी सेवा विस्तार गरिने जानकारी दिँदै ३न५ टेस्ला एमआरआई र १२८ स्लाइसको सीटी क्यान उपकरण केही महिनाभित्रै जडान हुने बताए ।
उनले चिकित्सा शिक्षातर्फ नयाँ विषयहरू थप गरिएको, सिट संख्यामा वृद्धि भएको पनि जानकारी दिए । भौतिक पूर्वाधारमा डेण्टल कलेजको नयाँ भवन निर्माण सम्पन्न भई सूचारु भइसकेको, सी ग्रेडको ल्याबलाई बी ग्रेडमा अपग्रेट गरिएको, अस्पताल भित्रै २४ ब्लड बैंक स्थापना गरिएकोले आउँदा दिनहरूमा कलेजको स्वास्थ्य सेवा र शैक्षिक गुणस्तरमा थप वृद्धि हुने विश्वास व्यक्त गरे ।
