काठमाडौं । काठमाडौंको दरबारमार्ग क्षेत्रको पैदल मार्ग (फूटपाथ)मा ग्रेनाइट बिछ्याउने काम थालिएको छ ।
नारायणहिटी संग्रहालय अगाडि महानगर प्रहरी वृत्त दरबारमार्गदेखि महेन्द्र शालिकसम्म दुवैतर्फको सडकमा ग्रेनाइट लगाउन सुरु गरिएको हो ।
५ करोड १५ लाख रुपैयाँ लागतमा उक्त काम थालिएको हो । महानगरपालिकाको सार्वजनिक निर्माण विभागका प्रमुख सुरज शाक्यका अनुसार पैदल मार्गको चौडाइ कम्तीमा ३ मिटरदेखि बढीमा ६ मिटरसम्म छ ।
सडकमा ग्रेनाइट राख्नुअघि गिटी र माटो मिसाएर बेस सोलिङ् गरिएको छ । त्यसभन्दा माथि ब्रिक सोलिङ् गरिएको छ । त्यसभन्दा पीसीसी ढलान गरिएको छ । त्यसभन्दा माथि ग्रेनाइट बिछ्याइन्छ । ग्रेनाइट १६ एमएमसम्मको हुनेछ । ग्रेनाइटको बाहिरी भाग खस्रो भएकोले यात्रामा चिप्लिने जोखिम हुँदैन ।
उक्त ग्रेनाइट लगाउने कामको ठेक्का सार्वजनिक खरिद प्रक्रियाबाट सदाशिव इन्फ्रा प्रालिले पाएको छ । गत २०८० चैत ६ गते निर्माण पक्षसँग सम्झौता भएको थियो । योजनाको निर्माण अवधि यही माघ मसान्तसम्म रहेको छ ।
