ठेक्का तोड्ने चेतावनीपछि नारायणघाट-बुटवल सडक निर्माणमा तीव्रता, १८ स्थानमा कालोपत्र हुँदै

काठमाडौं । पटक पटक म्याद थप्दा पनि कामले गति लिन नसकेको राष्ट्रिय गौरवको आयोजना अन्तर्गतको नारायणगढ-बुटवल सडकखण्ड विस्तारले पछिल्लो समय भने गति लिएको छ ।

निर्माण थालिएको ६ वर्षमा आयोजनाको हालसम्म आधा मात्रै काम पूरा भएको छ । तेस्रो पटक थपिएको समयमा पनि काम नसकिए ठेक्का सम्झौता नै तोड्ने सरकारको चेतावनीपछि ठेकेदारले अहिले कामको गति बढाएको हो ।

नारायणघाट-बुटवल सडक योजना पूर्वीखण्डका सूचना अधिकारी इन्जिनियर शिव खनालले अहिले उक्त खण्डका विभिन्न १८ स्थानमा कालोपत्र गर्नेगरी काम भइरहेको जानकारी दिए ।

‘फेब्रुअरीमा गैँडाकोटबाट दुम्कीबासम्म एकतर्फी कालोपत्र गर्ने गरी काम भइरहेको छ,’ उनले भने, ‘पुल र कल्भर्ट रहेका ठाउँबाहेकका सडकमा कालोपत्र गर्नेगरी काम भइरहेको छ ।’

पूर्वीखण्डमा पर्ने ६५ किलोमिटर सडकमध्ये पुल र कल्भर्टको भाग करिब तीन किलोमिटर रहेको जानकारी दिँदै उनले अहिले गैँडाकोटबाट दाउन्नेसम्म ४० किलोमिटर एकतर्फी कालोपत्र भएको बताए । अब करिब २२ किलोमिटर सडक कालोपत्र सकिएपछि नारायणघाटबाट दाउन्नेसम्म एक लेन सडकमा कालोपत्रको काम सकिने सूचना अधिकारी इन्जिनियर खनालले बताए ।

‘यो महिना दाउन्नेसम्म नै एकतर्फी कालोपत्र गर्ने योजना हो,’ उनले भने, ‘दाउन्ने क्षेत्रमा १०३ न वटा कल्भर्ट निर्माण गर्नुपर्ने भएकाले हामी दुम्कीबाससम्म कालोपत्र सक्नेगरी लागेका छौँ ।’

दाउन्नेको साँघुरो सडकमा कल्भर्ट निर्माण गर्दा सवारीसाधन एकतर्फी गर्नुपर्ने अवस्था रहेको भन्दै दाउन्नेसम्म कालोपत्र गर्न केही समय लाग्ने उनको भनाइ छ । सडक विस्तारका लागि ग्रेडर, लोडर, एकसाभेटरसहित १८ स्थानमा ५५० जना श्रमिकले काम गरिरहेको उनले जानकारी दिए ।

हालसम्म सडकको भौतिक प्रगति ५३.३ प्रतिशत रहेको भन्दै उनले १ महिनामा १.४३ प्रतिशत प्रगति भएको बताए ।

‘जनवरीमा पाँच किलोमिटर कालोपत्र थपियो, थप १२ किलोमिटर कालोपत्रको तयारी भएको छ,’ उनले भने, ‘गैँडाकोटस्थित नारायणी पुल नजिकै, डण्डा, सिजी, अरुणखोला बजार क्षेत्रमा कालोपत्रका लागि धमाधम काम भइरहेको छ ।’

दुम्कीबासको जङ्गल क्षेत्रको करिब ८ किलोमिटर क्षेत्रमा पनि कालोपत्र गर्नेगरी काम भइरहेको सूचना अधिकारी इन्जिनियर खनालले बताए । यस खण्ड निर्माणका लागि ग्लोबल ‘टेन्डर’मार्फत चिनियाँ निर्माण कम्पनी ‘चाइना स्टेट कन्स्ट्रक्सन इन्जिनियरिङ कर्पोरेसन लिमिटेड’लाई ठेक्का परेको थियो ।

विसं २०७५ माघ २२ मा सरकार र निर्माण कम्पनी बीच विसं २०७९ साउन २२ भित्र काम सक्नेगरी ठेक्का सम्झौता भएको थियो । कुल ११४ किलोमिटर सडकलाई गैँडाकोट-दाउन्ने (६५ किलोमिटर) र दाउन्ने-बुटवल (४९ किलोमिटर) गरी दुई खण्डमा विभाजन गरी आह्वान गरिएको ‘टेन्डर’मा दुवै खण्ड निर्माणको जिम्मा चाइना स्टेट कन्स्ट्रक्सनले पाएको थियो । विसं २०७५ चैत ८ गते तत्कालीन प्रधानमन्त्री केपी शर्मा ओलीले बुटवलबाट दुवै खण्डको शिलान्यास गरेपछि सडक विस्तारको औपचारिक काम सुरू भएको थियो ।

निर्धारित समयमा एक चौथाइ पनि काम नसकेपछि पहिलोपटक २०८० साउन ८, दोस्रोपटक २०८१ साउन ८ सम्मका लागि म्याद थप गरिएको थियो । निर्माण कम्पनीले कोभिड, निर्माण सामग्रीको अभावलगायत विभिन्न समस्या देखाउँदै तीनपटकसम्म ठेक्का सम्झौताको म्याद थप गराएको छ । आगामी साउन ८ गतेभित्र निर्माण सम्पन्न गर्नेगरी सरकारले तेस्रोपटक म्याद थप गरेको छ ।

म्याद थप गरिएको चार महिना काम नै नगरी समय बिताएको निर्माण कम्पनीलाई सरकारले कारबाही गर्ने गरी पत्राचार गरेपछि गत डिसेम्बरबाट पुनः काममा फर्किएको थियो ।

दुई लेनमा रहेको सडकलाई चार लेनमा विस्तार गरी दुई-दुई लेनको बीचमा ‘ग्रिनरी’ राखिनेछ । तीन मिटरको बीच भागमा बिरुवा लगाउने गरी ठेक्का सम्झौता भएको छ ।

सडक विस्तारपछि दुवैतर्फ सडकको चौडाइ सात/सात मिटरको हुनेछ । बजार क्षेत्रमा ६/६ मिटरको ‘सर्भिस लेन’ समेत निर्माण गरिनेछ । बजार क्षेत्रको १७.६ किलोमिटर सडकमा अतिरिक्त सर्भिस लेन निर्माण हुनेछ ।

बजार क्षेत्रमा सार्वजनिक सवारीसाधनले यात्रु चढाउन र ओराल्न सर्भिस लेन बनाइने योजनाले जनाएको छ । सडकको ४२.७ किलोमिटर खण्ड चार लेनको हुनेछ भने दाउन्ने खण्डको ५ किलोमिटर सडक तीन लेनको हुने जनाइएको छ ।

गण्डकीमा ४ अर्बभन्दा बढीको सुन्तला उत्पादन Read Previous

गण्डकीमा ४ अर्बभन्दा बढीको सुन्तला उत्पादन

लाइफ इन्स्योरेन्स कर्पोरेशनको ५ लाख कित्ता सेयर लिलामीमा आयो, कहाँबाट दिने आवेदन ? Read Next

लाइफ इन्स्योरेन्स कर्पोरेशनको ५ लाख कित्ता सेयर लिलामीमा आयो, कहाँबाट दिने आवेदन ?