काठमाडौं । सेयर बजारमा झिनो अंकको सुधार आएको छ । यसअघि तीन दिनमा लगातार ५९ अंकले घटेको नेप्से आज झण्डै २ अंकले बढेको हो ।
बुधबार नेप्से परिसूचक १.८३ अंकले बढेर २६९५.९६ बिन्दुमा पुगेको छ । सूचकमा झिनो सुधार आए पनि आज कारोबार रकममा भने गिरावट आएको छ । अघिल्लो दिनको तुलनामा कारोबार रकम ८३ करोडले घटेर ५ अर्ब ८२ करोड रुपैयाँमा सीमित भएको छ ।
कारोबारमा आएका १३ वटा समूहमध्ये ७ समूहको परिसूचक बढेको छ भने ६ को घटेको छ । हाइड्रोपावर समूहको परिसूचक सर्वाधिक १.७६ प्रतिशतले बढेको छ भने फाइनान्स ३.४८ प्रतिशतले घटेको छ ।
आज एनआरएन इन्फ्रास्ट्रक्चरको सर्वाधिक ३२ करोड ४९ लाख रुपैयाँ बराबरको सेयर किनबेच भएको छ । त्यस्तै, सुपर मादी हाइड्रोपावरको ३० करोड ८८ लाख रुपैयाँको कारोबार भएको छ ।
आज कारोबारमा आएका मध्ये १२४ कम्पनीको सेयर मूल्य बढेको छ भने १०८ कम्पनीको मूल्य घटेको छ ।
आज दोल्ती पावरको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् । त्यस्तै, सुपर मादी हाइड्रोपावर ९.८१ प्रतिशत, बाराही र श्वेत गंगा हाइड्रोपावरको सेयर मूल्य ८ प्रतिशतभन्दा धेरैले बढेको छ ।
न्यादी हाइड्रोपावरका सेयरधनीले भने सर्वाधिक १० प्रतिशत गुमाएका छन् ।
